Black Panther: مغامرة جديدة من مارفل

عالم مارفل السينمائي أثبت قوته وقدرته على جذب ملايين المشاهدين حول العالم. والنهردة بنشوف ضربة ومغامرة جديدة من مارفل، هل كانت بنفس قوة الأعمال التانية اللي قدمتها؟ تعالوا نتعرف أكتر على Black Panther

القصة

Black Panther بيحكي عن دولة متقدمة بفضل مادة قوية ونادرة بتسقط عليها من الفضاء، بتقرر أنها تداري تقدمها من خلال التنكر في شكل دولة بدائية، علشان تبعد الأطماع عنها، لكن كل الأمور دي بتختلف مع تتويج ملك جديد للمملكة واللي بيكون عليه التفكير في كل الثوابت القديمة لمملكته وإعادة هيكلتها من البداية.

فريق العمل

Black Panther من اخراج وتأليف  ريان جوجلير اقتباسا عن قصص مصورة لجاك كيربي، أما البطولة فكانت من نصيب  شادويك بوسيمان و مايكل بي جوردون و لوبيتا نيونجو و داناي جوريرا و مارتن فريمان

الأداء التمثيلي

الأداء التمثيلي لأبطال الفيلم كان مميز، الأمر اللي نقل الفيلم لكونه واحد من أفضل أفلام الأبطال الخارقين من مارفل. قد يكون مش أفضل فيلم على الإطلاق لكنه واحد من أفضل الأفلام وأكثرها قابلية لاعادة انتاجها وتقديمها في سلاسل أطول وأكثر تفصيلا للشخصيات.

السيناريو والحوار والأخراج

سيناريو الفيلم كان محتاج زمن أطول على الشاشة علشان يتبلور بشكل أفضل وياخد حقه في التفاعل مع الجمهور، لكن قصر زمن الفيلم زي ما كان عنصر ضعف للفيلم، أجبر القائمين عليه على تكثيف المشاهد وتقديم جرعة سينمائية قوية ومميزة في نفس الوقت، ومع وجود بعض الجمل الحوارية الكوميدية الخفيفة واللي قدرت تكسر الجانب الجاد في الفيلم نقدر نقول أن المخرج قدر يطوع أدواته الفنية علشان يقدم في النهاية تجربة مشاهدة ممتازة.

الديكورات والموسيقى والأزياء

الموسيقى التصويرية الخاصة بالفيلم كانت جميلة جدا، خاصة فكرة الدمج بين الموسيقى الأفريقية والموسيقى الحديثة واللي أعطت الفيلم روح جميلة تناغمت مع الديكور المميز والمتقن للغاية، خاصة مع وجود المؤثرات الخاصة القوية واللي تكاملت مع باقي عناصر الفيلم علشان تقدم لنا تجربة بصرية جيدة جدا.

الخلاصة

فيلم Black Panther يعتبر فيلم ممتاز لمحبي أفلام مارفل وأبطالها الخارقين

علشان تبقى عارف:

تقييم الفيلم على موقع IMDB 7.9 من 10