Black sea : النفوس الأسود من البحر!
البحر الاسود هو بحر داخلي يقع بين الجزء الجنوبي الشرقي لأوروبا وآسيا الصغرى يتصل بالبحر المتوسط عن طريق مضيق البوسفور وبحر مرمرة ويتصل ببحر آزوف عن طريق مضيق كيرتش.
على الاقل هي دي المعلومات اللى بيقولها موقع ويكبيبديا عن البحر الأسود، لكننا نعتقد أن رحلة الفيلم لم تكن مجرد رحلة في الجغرافيا، لكن ايضا رحلة فى النفس البشرية، اللى ممكن يكون سوادها واهتمامها بالمال يجعلها أسود من… البحر الأسود!
من تأليف دينيس كيلي واخراج كيفين ماكدونالد وبطولة جود لو و جودي ويتيكر و بين ميندلسون بنشوف سيناريو بيتأرجح بين التشويق والاثارة مع لمسة بسيطة من الرعب النفسى القائم على مشاهد الصراع تحت الماء عن كابتن بحار بيسعي للبحث عن غواصة ألمانية غارقة مليئة بالذهب. مع وعد بحصة متساوية من الذهب لكل الأعضاء المشاركين فى العملية.
الفيلم بيشبه فى قصته واسلوبه، عدد كبير من الافلام اللى بتتكلم على اقتسام حصة من الدهب او السعي وراء كنز مختلفى، زي سلسله The Italian job او The Good, the Bad and the Ugly وغيرها من الافلام، لكن المختلف فى الفيلم المرة دي ان الحبكة الاساسية بتدور تحت الماء.
الجزء المتميز من الحكاية بيتمثل فى طبيعة النفس البشرية ورغبتها فى تحقيق الثراء حتي لو كان على حساب المباديء او الاخلاقيات او حتي على حساب الأمن الشخصى او احتمالية التعرض للموت.. تحت سطح البحر.
الأداء التمثيلي للأبطال كان متميز، مع تركيز اخراجي على اللقطات القريبة والتركيز على ملامح الوجه فى حالات مختلفة من الارهاق والخوف او حتي الغضب. ومن هنا لازم نتكلم عن النقطة الثانية : التصوير المتميز تحت الماء واللى عرفنا انه تم فى غواصة حقيقية قديمه تابعة لروسيا، الأمر اللى ساعد على اكساب الأحداث واقعية وقوة.
الموسيقي التصويرية على الرغم من قوتها الا انها لم تكن متناسبه مع نوعية الاحداث، وحسينا انها كانت مكررة ومستهلكه ومش على نفس مستوي الفيلم، لكن الفيلم بشكل عام مستواه قوي وننصح بمشاهدته لمحبى افلام الاكشن المعتمده على فكره مختلفه واسلوب راقى من الاداء التمثيلي
