Bleed for this : مستعد تضحي بإيه علشان حلمك؟!
لما نتكلم عن الفكرة العامة الخاصة بتيمة النهوض من قاع اليأس إلي قمة النجاح، التيمة دي ممكن تكون واحدة من أكتر تيمات السينما المعاصرة تحقيقا للنجاح، وواحدة من أكتر التيمات مضمونة النجاح وتحقيق إقبال الجمهور على مشاهدتها، علشان الناس دايما بتحب الأفلام اللى بتحفزها وتعطيها القدرة على مواصلة الكفاح فى حياتها اليومية.
سنة 1976 قدم الفنان سلفستر ستالون الجزء الأول من سلسلة أفلام، هاتكون السبب فى إنطلاق شهرته فى الأوساط الفنية.. إسم الفيلم كان Rocky على إسم الشخصية الرئيسية للفيلم وهى روكي بالبوا الملاكم اللى بيصعد من الصفر لقمة عالم الملاكمة فى الولايات المتحدة.
مع تحقيق الفيلم لنجاح كبير تم تقديم جزء تاني منه سنة 1979 ثم جزء ثالث سنة 1982 ومع استمرار نجاح الفيلم اتقدم منه جزء رابع 1985 ثم خامس فى 1990، ناهيك عن تقديم أفلام مستقلة تعتبر أجزاء جديدة للسلسلة زي الجزء اللى تم تقديمه فى 2006 ثم فيلم Creed فى 2015.
ليه بنقول كل ده؟ علشان تفهموا معانا إن مجال أفلام الصعود من الصفر فى عالم الملاكمة بالذات أصبح مستهلك بدرجة كبيرة، خاصة مع وجود أفلام تانية ناقشت نفس الحبكة زي Million Dollar baby مثلا وغيرها من الأفلام.
فيلمنا اليوم واللى أخرجه بين يونجر ومن تأليف بيبا بيانكو مش بيخرج كتير عن التقاليد الأساسية لحبكات أفلام الملاكمة، وفى المجمل نقدر نقول إنه ماقدمش جديد على مستوي القصة والسيناريو، وإن كان الأداء التمثيلي كان فيه بعض التجديد.
الفيلم المقتبس عن قصة حقيقية بيحكي قصة حياة الملاكم فيني بازينزا، واللى بيحقق إنجازات متميزة فى مجال الملاكمة، ثم بيتعرض لحادث مروع بيكاد يفقد فيه حياته، وبيضطر للعيش بدعامات للرقبة تمنعه من تحريك رقبته علشان مايحصلوش انفصال فى الحبل الشوكي ويموت.
لكن على الرغم من الحالة الطبية الصعبة لـ(فيني)، وإن الدكاتره قالوا له إنه مش هايقدر يلعب ملاكمة تاني أبداً، إلا أنه استطاع استكمال تدريبه بالمخالفة لكلام الأطباء، واستعادة مكانته فى عالم الملاكمة تاني بعد فترة طويلة من الإنقطاع من أجل العلاج.
الفيلم من بطولة مايلز تيلر و أرون إيكهارت و كاتى ساجال و سياران هيندز و أماندا كلايتون و كريستين إيفانجليستا واللى قدموا أداء تمثيلي متميز، تناغم مع السيناريو اللى حاول يحافظ على نغمة هادية ومستقرة مابين الأكشن واللحظات الإنسانية، مع الحفاظ على خيط رقيق جداً من الكوميديا اللى بتظهر فى بعض المشاهد القليلة، والمعتمدة بالمقام الأول على الجمل الحوارية… والحوار كله بشكل عام كان قوي ومركز على الفكرة الأساسية للفيلم.
الموسيقي التصويرية كانت هامشية وضعيفة، وماحسيناش ان ليها تأثير قوي أو حقيقي على الأحداث، وده شىء أحبطنا فى الحقيقة لإن أفلام الملاكمة دايما بيكون لها تيمات موسيقية متميزة زي التيمة الموسيقية لفيلم روكي على سبيل المثال واللى تحولت لتيمة موسيقية عالمية وشهيرة جدا.
ديكورات الفيلم كانت جيده، وظهر فيها الحرص الإخراجي على نقلنا للحقبة الزمنية اللى بتدور فيها أحداث الفيلم، ومع مقارنتنا بين أحداث الفيلم واللى حصل فى الحقيقة اكتشفنا إن كان فيه اهتمام غير عادي بتقديم الجزء الأكبر من القصة الحقيقية والأصلية تماماً كما حدث بدون زيادة أو نقصان إلا فى بعض التفاصيل الصغيرة، وده شىء يحسب للسيناريو والقائمين عليه.
Bleed For This فيلم جديد يضاف لسلسة أفلام الملاكمة.. ماقدمش جديد على مستوي الفكرة لكن الأداء التمثيلي والسيناريو المقتبس عن قصة حقيقية يستحقوا التحية.
