Bloodshot : التريلر حرق الأحداث!
حماس كبير حسيناه ناحية فيلم Bloodshot بمجرد الإعلان عنه. لأنه بيجمع بين فين ديزل ممثل الأكشن الشهير وبين فكرة أفلام الأبطال الخارقة. لكن بعد ما شوفنا الفيلم أتكون عندنا شعور سلبي هانتناقش معاكم في أسبابه.
Bloodshot بيحكي عن جندي أمريكي بيعيش حياة سعيدة مع زوجته، وفي أحد الأيام بيتعرض لحادثة وبيتعرض للقتل. لكن – ومن خلال تقنيات تكنولوجية حديثة جدا – بيتم استعادته تاني من الموت لصالح تنفيذ مهام معينة. لكنه بيقرر ينتقم في نفس الوقت من اللي قتلوا حبيبته.
حسينا بالإحباط علشان تريلر الفيلم حرق لنا قصة الفيلم بالكامل. علشان كده بننصحكم لو عاوزين تشوفوا الفيلم بلاش تشوفوا الإعلان بتاعه! ومش عارفين ازاي مخرج الفيلم ديف ويلسون وافق على أنه يعمل اعلان تقريبا بيشرح كل حاجه في الفيلم بالشكل ده!
للأسف دي مش غلطة ويلسون الوحيدة، ويلسون – واللي Bloodshot هو إخراجه الأول- بالغ في استخدام تقنيات التصوير البطىء، وحاول يعالج كل ده في المونتاج لكن حتى المونتاج باظ منه وحسينا في كتير من المشاهد أن فيها مشاكل في تقطيعها والانتقال منها لمشاهد تانيه.
لكن من ناحية تانيه أداء ديزل التمثيلي كان جيد. والحقيقة انه قدم لنا كل اللي متوقعينه منه. مشاهد حركة طول الوقت ومطاردات جيدة، لكن طبعا مش بنتوقع الكتير من فان ديزل على صعيد الأداء الدرامي لأنه ممثل أكشن بالمقام الأول.
Bloodshot فيلم ممتاز لو شوفتوه بدون توقعات مسبقة، ولو ابتعدتوا تماما عن مشاهدة إعلانه علشان تستمتعوا بالأحداث. وننصح بيه لعشاق فان ديزل اللي بيتابعوا كل اعماله.
