Boarding School : الرقص على سلالم الرعب!
الرعب المرتبط بأماكن معينة. مغلقة وكئيبة. أو بتحتوي على أسرار دفينة. يعتبر واحد من أهم وأكثر أنماط الرعب تأثيرا. يمكن لارتباطه في نفسية المشاهدين – على الرغم من الأختلافات الكبيرة بينهم- بالوحدة والكأبة والتعرض للخطر.
لكن للأسف المخرج والمؤلف (بواز ياكين) حاول يلعب على أكتر من تيمة بتجمع الرعب بالغموض بالأشخاص الغير مريحة أو اللي بتخفي سر ورائها. وللأسف فشل في النهاية – في رأينا- إنه يقدم فيلم قوي على اي صعيد من الأصعدة دي.
Boarding School بيحكي عن (جاكوب) واللي بيقوم بدورة (لوك بريل) واللي بينتقل لمدرسة داخلية متخصصة في علاج الحالات النفسية اللي بتصيب الأطفال والمراهقين بعد خسارتهم لحد عزيز عليهم. وفي محاولته للتشافي من التعلق المرضي بجدته المتوفية بيبدأ (جاكوب) في اكتشاف المدرسة الداخلية والأسرار الغريبة الموجودة هناك والأشخاص المتواجدين معه في نفس المكان.
(بواز ياكين) مخرج الفيلم من الناس اللي مش بتقدم أعمال كتير. ومن الواضح أن عنده فترة حوالي 3 أو 4 سنوات بين كل فيلم والعمل اللي بعده. وعلى الرغم من مسيرته غير الحافلة كمخرج (من حيث العدد)، لكن أعماله كمؤلف قوية ومؤثرة. زي مثلا سلسلة أفلام Now You See Me و Max و Safe بعض أعماله كمخرج قوية ومؤثرة زي Remember the Titans
على صعيد البطولة بنشوف (لوك بريل) في دور جيد، وعلى الرغم من حداثه سنه – وعمله في السينما- إلا أنه من الواضح أنه بيجتهد في الشغل على نفسه علشان يقدم لنا في النهاية دور قوي ومؤثر.
بيشارك في البطولة ثامنثا ماثيز في دور ايزابيل. وديفيد بيكر في دور (دايفس). لكن بشكل عام مش بنشوف دور مميز في الفيلم أو ممثل قام بمشهد لا يُنسى. على الرغم من محاولة السيناريو خلق لحظات تفرد لبعض الأدوار الرئيسية في الفيلم.
من العناصر القوية في الفيلم الديكورات واختيار أماكن التصوير. كمان الموسيقى التصويرية لعبت دور مهم علشان ننتقل على صعيد الزمان والمكان لفترة ومكان أحداث الفيلم. لكن للأسف عندنا شعور قوي أن القصة والسيناريو لم تستغل كل ده علشان تقدم في النهاية فيلم قوي.
Boarding School محاولة للرقص على سلم السينما.. مابين الرعب والغموض والاثارة. ننصح بمشاهدته كل اللي بيحبوا الافلام اللي بتدور في اماكن مغلقة او فيها اسرار خفية.
