Bombshell : لعب على تقيل علشان الأوسكار
من دلوقت ولحد الإعلان عن نتائج جوائز الأوسكار. هانشوف أفلام كتيرة مقتبسة عن قصص حقيقية علشان تحاول تلفت انتباه القائمين على المسابقة. لكن مع Bombshell مش بنشوف فيلم مقتبس عن قصة حقيقية بس. احنا كمان بنشوف فيلم نسائي من الطراز الأول.
فيلم Bombshell بيحكي عن قصة حقيقية عن كيفية إدارة الأمور في شبكة فوكس نيوز الأمريكية. وعن حالات التحرش الجنسي اللي حصلت هناك وتحولت من مشكلة داخلية لفضيحة ضخمة كانت من أهم مقومات حملة Me too الشهيرة اللي انتشرت ضد التحرش الجنسي في أمريكا ثم في العالم.
Bombshell مش العمل الوحيد اللي بيحكي عن حملة Me too وشوفنا مؤخرا مسلسل The morning show من انتاج أبل واللي بيناقش نفس الحملة لكن من خلال قصة غير حقيقية على الأقل في الجزء الأكبر منها.
أحلى حاجه لفتت انتباهنا في Bombshell هي الأداء التمثيلي الأكثر من رائع من كل بطلات الفيلم. وخاصة الجميلة والمميزة تشارليز ثيرون. وطبعا لا يمكن نتجاهل دور نيكول كيدمان ومارجو روبي. كلهم قدموا أدوار أكثر من رائعة. والمكياج كمان لعب دور أكثر من رائع علشان يساعد الممثلات دول يلعبوا دورهم بالشكل اللي شوفناه على الشاشة.
لكن طبعا من ناحية تانيه مش قادرين (نبلع) النغمة النسائية المبالغ فيها أحيانا في سرد الأحداث وده مفهوم من فيلم المفترض أنه بيناقش مشكلة نسائية بالمقام الأول.
الجميل كمان في سرد الفيلم هو انتقاله من نقطة للتانيه بسرعة وسلاسة بحيث لا نشعر بالملل. وطوال الوقت كان الفيلم بيصدر لنا الشعور بالدهشة من حدوث كل التجاوزات دي في مؤسسة أمريكية واللي المفروض فيها شغاله بقوانين وقواعد صارمة.
على كل حال.. فيلم Bombshell هايعجب الناس المهتمة بالقضايا النسائية. والناس المهتمة بحملة Me too وطبعا الناس اللي عاوزه تتفرج على أداء تمثيلي جميل وأحداث مشوقة من البداية للنهاية
