Bonnie Bears: Blast Into The Past : تجربة مهمة للأنيميشن الصيني
لما بنتكلم عن اقوى وأفضل أفلام الأنيميشن حوالين العالم يبقى أكيد بنتكلم عن أفلام الأنيميشن الأمريكية اللي بتنتجها شركات زي بيكسار وديزني وغيرها. لكن ده لا ينفي أن عندنا محاولات قوية من جهات انتاج صينية وهي اللي قدمت لنا Bonnie Bears: Blast Into The Past
Bonnie Bears: Blast Into The Past بيحكي عن مجموعة من الدببة بتعود بالزمن للعصر البدائي وبيبدأوا يتعاملوا بقواعد وقوانين الفترة دي في جو من المغامرة والأثارة.
بنشوف في الفيلم أداء صوتي من جوزيف إس لامبرت و سيوبهان لومزدن و كريس بويك وباقي الممثلين قدموا أداء متوسط. وحسينا في بعض المشاهد أن الصوت مش ماشي مع المشاهد اللي بنشوفها على الشاشة. لكن الأداء الصوتي في حالة Bonnie Bears: Blast Into The Pastمش أهم عنصر من عناصر الفيلم مقارنة بالرسومات ودقتها واللي كانت جميلة جدا. وطريقة تحريك الشخصيات على الشاشة كانت كويسه جدا ومتعوب عليها جدا.
لكن بشكل عام Bonnie Bears: Blast Into The Past مش بيقدم حبكة مختلفة عن باقي الأفلام الأمريكية المشابهة. وده له ميزة وعيب.. من ناحية هو بيلعب على نفس عوامل القوة والنجاح اللي بيلعب عليها أي فيلم امريكي تاني. لكن من ناحية تانيه مش بيقدم أي بصمة مختلفة أو طريقة جديدة في حكاية القصة وتقديمها لنا كمشاهدين.
Bonnie Bears: Blast Into The Past باختصار هو فيلم جيد يستحق المشاهدة لكل محبي أفلام الانيميشن الامريكية التقليدية. لو متوقعين أي حاجه مختلفة أو غير تقليدية مش هاتكون موجودة في الفيلم ده.
