Brahms: The Boy II : الأيقاع بوظ الفيلم
مانقدرش نقول على أفلام الرعب المعروضة في سينمات القاهرة حاليا غير أنها ضعيفة ومملة الى أقصى درجة. على الرغم من السهولة النسبية لأنتاج أفلام رعب حتى لو بميزانية قليلة.
Brahms: The Boy II بيحكي عن عائلة بتتعرض لحادث مرعب بيجبرها على تغيير محل اقامتها. وفي المكان الجديد اللي بينتقلوا له الإبن بيلاقي دمية مدفونة. ومن هنا بتبدأ كل أحداث حياة الأسرة في التحول.
نقدر نقول أن الأداء التمثيلي لكاتي هولمز و أوين يومان وباقي أبطال الفيلم كان ممتاز. وقدروا ينقلوا لنا الشعور العام بالرعب. لكن سيناريو الفيلم والايقاع بتاعه كانوا ضايعين تماما. خاصة في وسط الأحداث. لدرجة أننا حسينا عند مرحلة معينة أن الفيلم نسي أنه فيلم رعب وبدأ يتحول لمجموعة من الأحداث الضعيفة غير المترابطة والغير مبررة على صعيد الدراما إطلاقا.
حتى الدمية اللي المفروض تكون مصدر الرعب في الفيلم كان تصميمها وحش جدا ومش مرعب على العكس من الدمية اللي تم استعمالها في سلسلة أفلام Annabelle على سبيل المثال.
أغرب ما في Brahms: The Boy II أنه بيمهد المشاهدين لجزء ثالث. ونعتقد أن الجزء الثالث ده هانشوف فيه تفسير للأحداث اللي حصلت في الجزء ده. لكن لو كان الجزء الثالث بنفس مستوى الجزء الحالي بنعتقد أنه مش هايكون فيه مشاهدين للفيلم في السينما من الأساس!
