Braven: الشجاعة في الدفاع عن العيلة

ياترى بتحب أسرتك الصغيرة أد ايه؟ وايه هي التضحيات اللي ممكن تقدمها علشان الاسرة دي تعيش بسلام بعيد عن أي تهديد؟ على الرغم من أن دي الأسئلة الأساسية اللي بيطرحها فيلم Braven واللي اجابتها ممكن تكون بديهية عند كتير منا، إلا أن معايشتنا لأحداث الفيلم أكسبت الأسئلة دي بعد تاني.

القصة

Braven بيحكي عن شاب بيجد نفسه في موقف لا يحسد عليه، لما بيحاول مجموعة من تجار المخدرات أنهم يقضوا عليه هو وأسرته، وبيجد نفسه المدافع الوحيد عن الأسرة دي علشان يقدر يخرج من الموقف الصعب اللي هو فيه. هل هايقدر ينجو في النهاية أم هاتقضي عليه العصابة اللي افرادها مدربين على أعلى مستوى؟

فريق العمل

Braven من اخراج لين أودينج ومن تأليف توماس باس سيبات ومن بطولة جايسون مومو و جاريت ديلاهانت و ستيفن لانج و زان مسسلارنون و جيل واجنر

الأداء التمثيلي

جايسون مومو شوفناه قبل كده في واحد من أشهر المسلسلات الأجنبية على مستوى العالم وهو مسلسل لعبة العروش. والحقيقة أن مومو صدر لنا شعور أنه مجرد جسد عملاق وقوي بدون أي قدرات تمثيلية، لكنه من خلال دوره في Braven قدر يثبت أن عنده قدرات تمثيلية كتيرة يقدر يستغلها بشكل قوي ومميز.

السيناريو والحوار والأخراج

سيناريو الفيلم بينقسم لنصفين، الجزء الأول بيستعرض لنا الحياة الجميلة اللي بتعيشها الاسرة وبداية المشكلة اللي بيتعرضوا لها، ثم النصف الثاني واللي بنشوف فيه الكفاح من أجل حماية الأسرة، والحقيقة أن الجزء الثاني كان الرتم بتاعه أسرع وأمتع من الجزء الأول من الأحداث.

حوار الفيلم كان مكتوب كويس قوي والأخراج قدر يوظف العوامل دي كلها علشان يقدم لنا في النهاية عمل قوي على الرغم من قلة الميزانية اللي بيتحرك فيها.

الديكورات والموسيقى والأزياء

الفيلم استغل المناخ البارد علشان يقدم لنا مجموعة من المشاهد اللي ممكن تجمد الدم في عروق أي مشاهد، كمان الموسيقى التصويرية الخاصة بالفيلم ساعدتنا علشان نعيش جو الترقب والأثارة اللي كان بيزيد مع كل مشهد، ودي كانت واحدة من الأمور اللي تحسب للفيلم وصناعه.

الخلاصة

فيلم Braven فيلم جميل عن الشجاعة من أجل حماية الأسرة وايه الأمور اللي ممكن تكلفها حماية العائلة.

علشان تبقى عارف:

تقييم الفيلم على موقع IMDB 6.5 من 10