Breathe: فيلم بينافس على الأوسكار
مع اقتراب شهر فبراير من كل سنة بيقترب موسم الصراع على جوائز الأوسكار، ورغم عدد الأفلام الكبير اللي تم طرحه في 2017 الا أن الأفلام اللي تستحق الفوز باللقب تعتبر قليلة نسبيا، لكن فيلم Breathe في رأينا واحد من الأفلام اللي بتحاول المنافسة بقوة في فئة أفضل فيلم أو أفضل بطولة أو أفضل دور مساعد.. تعالوا نتعرف أكتر على الفيلم وأحداثه.
القصة
Breathe المقتبس عن قصة حقيقية بيحكي قصة حياة روبرت كافنديش اللي بيصاب بمرض بيخليه يفقد التحكم في معظم عضلات جسمه، لكنه على الرغم من مرضه وظروفه الصعبة بيقرر تحدي كل الصعاب وانه يكون انسان مميز وقادر على انه يعيش حياته بالشكل اللي هو عاوزه مش زي ما الناس عاوزاه.
فريق العمل
الفيلم من إخراج أندي سركيس وتأليف ويليام نيكلسون وبطولة أندرو جارفيلد و كلير فوي و ديانا ريج و توم هولاندر وهيو بونفيل
الأداء التمثيلي
الأداء التمثيلي لأندرو جارفيلد في دور البطولة كان اكتر من رائع، وقدر أندرو أنه يوصل لنا كل انفعالات ومشاعر بطل الفيلم بشكل رائع وشبه كامل، لكن دوره كان هايفقد جزء كبير من رونقه لو كانت بجواره ممثلة اقل من كلير فوي واللي قدرت تقوم بدورها بشكل رائع ومميز هي كمان وتقدم أداء مساند رائع وقادر على انه يوصل لنا المشاعر الخاصة بالشخصية اللي بتقوم ببطولتها بشكل رائع.
السيناريو والحوار والأخراج
على الرغم من قوة وتميز السيناريو لكننا حسينا ببعض الملل خاصة في الربع الأول من الأحداث، لكن بعد كده السيناريو قدر يتوازن ويقدم لنا عمل جيد وسيناريو سهل الفهم ومتدفق الأحداث ومبهر في كافة تفاصيله، أما الإخراج فا قدر يقدم لنا صورة سينمائية مميزة تجمعت فيها كافة عوامل الأفلام القوية من ديكورات وموسيقى وأداء تمثيلي رائع وكل ده يحسب في النهاية للمخرج وفريق عمله.
الديكورات والموسيقى والأزياء
زي ما قولنا الديكورات كانت معبرة جدا عن أحداث الفيلم والفترة الزمنية اللي بيدور فيها، وتكاملت الديكورات مع الموسيقى التصويرية علشان يقدموا لنا في النهاية فيلم قوي ومؤثر ونعتقد أنه هايكون منافس قوي على الأوسكار.
الخلاصة
Breathe فيلم قوي ومميز ونعتقد أنه هايكون منافس قوي على الأوسكار.. هانعرف مين الفائز النهائي في فبراير 2018
علشان تبقى عارف:
الفيلم يعتبر أول تجربة إخراجية للممثل أندي سركيس.
