Bridge Of Spies : محاولة متوسطة لأستعادة نجاح قديم
توقعاتنا بخصوص الفيلم كانت أكتر من رائعة، لأن الثنائى الأخراجي والتمثيلي فى الفيلم (ستيفن سبيلبرج) و (توم هانكس) سبق وتعاونوا فى فيلم اكثر من رائع هو Saving Private Ryan حصد عدد كبير جداً من جوائز الأوسكار، وترشح لعدد أكبر من الجوائز.
اليوم فى التعاون الجديد بين النجمين العالميين بنشوف فيلم (جسر الجواسيس) أو Bridge Of Spies وهو عبارة عن دراما مقتبسة عن قصة حقيقية عن محاولة محامي امريكي هو جيمس دونفان واللى بيقوم بدوره توم هانكس، فى اتمام صفقة تبادل بين جاسوس سوفيتي تم امساكه فى الولايات المتحدة، وبين طيار امريكي لطائرة تجسس وقعت طائرته فوق أراضي روسيا.
الفيلم بتدور أحداثه فى فترة الحرب الباردة بين روسيا وامريكا، وهى الفترة اللى اعقبت نهاية الحرب العالمية الثانية، وتقسيم المانيا المنهزمة لجزئين.. واحد غربي تابع لامريكا والثاني شرقي تابع لروسيا، ويفضل للمهتمين بالفيلم انهم يقرأوا ببعض التفصيل عن فترة الحرب الباردة علشان يكون عندهم معلومات افضل عن الأحداث، وان كان الفيلم واضح ولا يشوبه اي غموض او مشاكل فى فهم الأحداث.
الأداء التمثيلي لكل الأبطال كان متميز جداً، وطبعاً على رأسهم العظيم توم هانكس، لكن لأننا متعودين من (هانكس) على اداء اسطوري، ومش محتاجين نفكركم بأفلام زي Cast Away او Forrest Gump وغيرها من الأفلام اللى قدم فيها (هانكس) اداء اسطوري، بالتالى اداؤه فى فيلم اليوم على الرغم من تميزه الا انه لم يكن بقوة باقى الأفلام اللى شوفناها له قبل كده.
الفيلم تميز بديكورات متميزة، نقلتنا لفترة الحرب الباردة بشكل صادق وبدون اخطاء تقريباً، اما الموسيقي التصويرية فكانت ناعمة وهادئة وبتتسلل فى الخلفية بهدوء، لكنها لم تتميز فى احد المشاهد عن باقى المشاهد، وده يمكن كان من عوامل ضعفها وهى التزامها بخط سير واحد.. لازم كمان نعرف ان الفيلم ده يعتبر أول فيلم لستيفن سبيلبرج لا يضع موسيقاه الموسيقار جون ويليامز منذ فيلم The Color Purple.
نعتقد ان توقيت عرض الفيلم، وكونه مقتبس عن قصة حقيقية، كلها عوامل بتخلينا نتفهم محاولة ستيفن سبيلبرج الحصول على الأوسكار من جديد، لكن وعلى الرغم من اعجابنا بالفيلم الا ان عندنا شعور انه لا يستحق الأوسكار، لكن ممكن يحصل على بعض الترشيحات.
