BrightBurn : مش كل الكائنات الخارقة طيبة!
من أهم الحاجات اللي بنحبها في الأفلام فكرة الإلتواء اللي بيحصل أو Plot twist يعني أننا نتوقع حاجه معينة ويحصل عكسها. وفي حالة فيلم BrightBurn بنتوقع أننا نشوف كائن خارق للطبيعة وعنده قدرات خارقة يفيد بيها البشر. لكن اللي بيحصل في الفيلم ان الكيان الخارق ده بيستعمل طاقته في الشر والإيذاء. الوحش كمان أننا بنتفاجىء بالموضوع ده بمجرد مشاهدة اعلان الفيلم بالتالي بيروح علينا جزء كبير من قوة حبكة الفيلم
وأي صناع فيلم كان ممكن يعملوا حبكة قوية جدا من الجمع بين القدرات الخارقة وبين الرعب. لكن المخرج ديفيد ياروفيسكي فشل في انه يقدم مزيج جيد من الرعب مع الخيال العلمي. رغم (القماشة) الجيدة اللي كانت معاه خاصة أن الأداء التمثيلي في الفيلم كان جيد
جاكسون إيه. دان في دور براندون قدر يقدم أداء تمثيلي جيد. لكن المؤثرات والخدع الخاصة لم يتم الأهتمام بيها. وبشكل عام حسينا أن الفيلم مش مخصص له ميزانية كبيرة. النتيجة كانت ان كتير من مشاهد الفيلم كانت ضعيفة ودون المستوى ولما يكون الفيلم عن القدرات الخارقة والمرعبة وتكون المؤثرات ضعيفة النتيجة بتكون ضعف عام في الفيلم وشعور المشاهدين بالتوهان بين الأحداث
المزيج الإجمالي للفيلم ما بين حبكة محروقة في الإعلان وأداء تمثيلي جيد مع خدع سينمائية مش مصروف عليها كويس أدت في النهاية لأننا أمام فيلم فاقد الهوية. ومش عارفين هل ده فيلم خيال علمي مع نكهة رعب أم فيلم مرعب مع بعض الخيال العلمي. وماعرفش الفيلم ينجح لا على صعيد الرعب ولا الخيال العلمي!
بنرشح BrightBurn للمشاهدة لو كنتم من محبي أفلام الرعب مهما كان موضوعها ومستواها وميزانيتها. في الحالة دي الفيلم هايعجبكم