Bumblebee: مغامرة جديدة للسيارات المتحولة

على الرغم من أن سلسلة أفلام (المتحولون) أو Transformers بدأت مع بداية الثمانينات، وكانت عبارة عن إعلانات متواضعة للعربيات، إلا أن الفكرة تحولت إلى فيلم ثم الى مجموعة أفلام وسلسلة كاملة لها عشاق حول العالم.

مستوى إعجاب الجمهور بالسلسلة كان متغير من وقت للتاني. بعض الأجزاء حققت نجاح كبير يعني مثلا الجزء اللي تم اصداره تحت عنوان transformers: dark of the moon واللي تم اصداره سنة 2011 حقق إعجاب جماهيري ونقدي عالي. على العكس من الجزء اللي تم اصداره في 2009 تحت عنوان Transformers: Revenge of the Fallen وحقق فشل ذريع.

فيلم Bumblebee بيعود بالأحداث للبداية. لما بنتعرف على قصة بنت مراهقة (قامت بالدور هالي ستينفيلد) واللي بتحصل على سيارة فولكس صفراء قديمة. لكن مع الوقت بتكتشف أن السيارة اللي بتتحرك بالعافية هي في الأصل كائن متحول. وبيتحول لإنسان ألى متطور وقادر على القتال. ومن هنا بيحصل وحدة في المصير بين (تشارلي) وبين الكائن الألي بامبلبي.

من أهم الأمور اللي أعجبتنا في الفيلم هي الخدع السينمائية وطريقة عملها مع باقي مشاهد الفيلم. وتكاملها معاه علشان تخرج في النهاية صورة جيدة جدا. صورة قدر المخرج ترافيس نايت يقدمها باحترافية، خاصة أنه قادم من خلفية اخراج افلام انيميشن. وهو اللي قدم لنا فيلم Kubo and the Two Strings سنة 2016 واللي كان من أقوى أفلام الأنيميشن في الفترة دي.

هالي ستينفيلد بطلة الفيلم قدمت قبل كده ادوار قوية ومتميزة، ومعظم أدوارها بتدور في فلك البنت المراهقة اللي بتحاول تجد لنفسها مكان في الدنيا، وقامت بأدوار في أفلام زي Pitch Perfect 2 و Ender’s Game و The Edge of Seventeenوالحاصل على تقييم 7.4 من 10 على موقع IMDB

كان نفسنا عدد أكبر من المشاهد يتم تنفيذه في النهار علشان نشوف أجواء تصوير مختلفة، لكن الفيلم في غالبه كانت بتسيطر عليه الأجواء الليلية وده كان من عيوب الفيلم من وجهة نظرنا.

Bumblebee فيلم مميز. نرشحه للمشاهدة لمحبي أفلام السيارات المتحولة والمغامرات اللي مش بتتوقف من أول مشهد لأخر مشهد