Burnt: طبخة سينمائية جميلة

فى رأينا ان الفيلم الحلو زي الطبخة الحلوة.. طعمهم لذيذ والأنسان بيقضى من خلالهم وقت جميل وحياه لطيفة. بالتالى بنحب الأفلام اللى بتتكلم عن الطبخ وحياه الشيف بشكل عام، مشكلتنا الوحيدة مع الفيلم اننا اتفرجنا عليه واحنا جعانين بعض الشىء… طبعا كانت معاناة.

من اخراج جون ويلز وبطولة برادلي كوبر و إيما طومسون و سيينا ميلر و اوما ثورمان بنشوف قصة شيف محترف، حاصل على نجمتين (ميشلان)، وهى للى مايعرفش نجوم بتستعمل لتقييم المنشأت الفندقية والشيفات، والحصول على 3 نجوم فيها يعتبر من افضل درجات التقدم الوظيفى للشيف…

الشيف بتاعنا على الرغم من احترافيته وحصوله على نجمتين من اصل تلاته، الا انه سقط فى بئر الأدمان وأهمل عمله وضاعت حياته فى دوامه كبيرة من الهموم والفشل المتراكم.. كل ده احنا مش بنشوفه لكن بنشوف اثره على حياته بعد كده.. الشيف بيحاول يعود من جديد لحياته السابقه ومجده، وبيحاول يحصل على نجمة ميشلان الثالثة من خلال الانخراط فى حياة اكبر المطاعم الأمريكية واكثرها كلاسية وشهرة.

على الرغم من اننا نقدر نصنف الفيلم كفيلم كوميدي، الان الكوميديا فى الفيلم بتعتبر وسيلة لبلوغ الهدف النهائى وهو توصيل رسالة ان الانسان يقدر يصمد ويخرج من اي تجربة صعبة دخلها، ويعيد بناء نفسه من جديد فقط لو كان يملك المهارة والرغبة الحقيقية فى العودة من جديد للطريق الصحيح.

الألوان فى الفيلم كانت جميلة ومبهرة، وده على عكس موضة الالوان المنتشرة فى افلام هوليود مؤخرا والقائمة على استعمال اللون الأزرق الباهت او الرمادي، ويمكن فيلم Mad Max كان فاتحة خير على نوعية الافلام اللى بتستعمل الوان اكثر دفئا واختلافا.

الموسيقي التصويرية كانت جميلة ومتميزة فى كتير من المشاهد، وكان لها روح خاصة ظهرت خلال الاحداث بقوة وكفاءة، وكانت من وجهة نظرنا من عوامل قوة الفيلم، كمان الديكورات كانت ممتازة وقدرت تنقل لنا حقيقة اللى بيحصل فى كواليس عالم المطعام الكبري فى امريكا، خاصة ديكورات المطابخ وأدوات الطبخ، وطبعا البذخ الانتاجي فى الأصناف والمأكولات اللى كانت بيتم طبخها.

على الرغم من كل العوامل اللى فاتت دي تسرب لنا الملل بعض الشىء خلال احداث الفيلم، خاصة فى منتصف الأحداث، لكن البداية والنهاية كانت قوية ومشوقة ومشجعة على مشاهدة الفيلم، والفيلم بشكل عام يعتبر مستواه كويس لو ها تتفرجوا عليه من باب مشاهدة فيلم كوميدي خفيف فى نهاية الأسبوع.. ما تتوقعوش اكتر من كده.. وزي ما قولنا ما تتفرجوش على الفيلم بمعدة خالية!