Camp X-Ray : السجن والسجان .. والمسجون

فى واقع الامر، فكرة العلاقة الانسانية اللى بتقوم بين اشخاص على طرفى النقيض، مش فكرة جديدة ولا حاجه، شوفناها فى كتير من الافلام الاقوى واعمق من Camp X-Ray ، لكن تظل الفكرة فى حد ذاتها جميلة وقابلة للتفكير والدراسة والتطويع فى اكتر من فيلم وبأكتر من شكل.

من تأليف واخراج بيتر ساتلر، بنشوف كريستين ستيوارت و بيمان معادي ، الاولى فى دور فتاة بتعمل كجندية سجانة فى سجن جوانتانمو، والثاني فى دور سجين بيقضى تمن سنوات من السجن فى المعتقل الاكثر شهرة فى العالم، والاكثر ضجة فيما يتعلق باخبار التعذيب والاستجواب وظروف الاحتجاز الغير ادمية اللى بيتعرض لها المحتجزين به.

على الرغم من قوانين السجن الصارمة ، وعلى الرغم من عدم معقولية وجود اى علاقه انسانية بين الاتنين، الا ان علاقة جميلة بتبدا تتسرب بين السجين والسجانه ، علاقه بتحدها السلوك الشائكة وبيقف فى وجهها الزجاج العازل! لكن مهما كانت العوائق والموانع، مافيش حاجه تقدر تقف قدام علاقة صداقة وتعاطف بتنشأ بين شخصين. وهى دى الرسالة الاساسية للفيلم.

على الرغم من ان المفروض ان الاداء التمثيلى للابطال يكون اعظم ما يمكن، ويكون صاحب الفضل الاول لنجاح الفيلم، الا اننا حسينا ان الاداء التمثيلى للابطال لم يكن بالقوة اللى توقعناها، حسينا ببعض الملل خلال الاحداث، وعلى سبيل المثال مشهد التهديد بالانتحار، واللى كان المفروض اى اتنين ممثلين يوصلونا لذروة التعاطف والتوحد مع مشاعرهم كممثلين، لكن المشهد شعرنا فيه بكتير من المط والتطويل والجمل الحوارية المركبة اللى مش بتخرج من الناس العادية فى الاوقات العادية، ودي كانت سمة شبه عامة فى الحوار اللى حسينا انه فى اغلبه مكانش طبيعي.

على الرغم من كم الاسقاطات السياسية اللى كان ممكن تكون موجوده فى الفيلم، الا ان القائمين عليه فضلوا الاهتمام بالجانب الانسانى اكتر من الجانب السياسى ودى من الامور اللى تحسب للقائمين على الفيلم واللى قدروا يهتموا بجانب قد يكون غير مهم للبعض، على حساب جانب اخر بديهي كان اى مخرج اخر هيشتغل عليه.

الموسيقي التصويرية على الرغم من قوتها فى بعض المشاهد، الا ان بعض المشاهد الاخرى لم تكن بالقوة اللى توقعناها منها، وبشكل عام مع خروجنا من الفيلم ونهاية  الاحداث، لم نشعر ان الموسيقي التصويرية تركت بداخلنا اى انطباع يذكر.

لو كنت من عشاق الافلام الانسانية هايعجبك الفيلم، لكن لو متخيل انه فيلم حربى او فيه جرعه من الاكشن والغموض، ننصحك تشوف فيلم تاني فورا.