Captive State : خيال علمي ده ولا سياسة!
بعض الأفلام بتحتاج تركيز أثناء مشاهدتها. لأن على الرغم من وضوح قصتها بيكون لها أجندات أو رسائل تانيه عاوزه توصلها من خلال الأحداث. وده ينطبق بشدة على فيلم Captive State اللي على الرغم من تصنيفه كفيلم خيال علمي لكن حسينا فيه بكتير من الرسائل السياسية.
Captive State بيحكي عن المستقبل البعيد. لما بيتم السيطرة على مدينة شيكاجو الأمريكية بواسطة مجموعة من الكائنات الفضائية الغريبة. وبيتناول الفيلم قصص مجموعة من الأشخاص على مختلف الأصعدة وطريقة تعاملهم مع الغزو.
على الرغم من تعليقات المشاهدين الإيجابية عن الفيلم لكن النقاد كان لهم رأي تاني. علشان كده أي محاولة لمعرفة الأراء عن الفيلم على الأنترنت هانشعر من خلالها أن فيه معركة بين النقاد المحترفين وبين الجمهور اللي بيدور على المتعة والإثارة قبل أي حاجه. والحقيقة إحنا عاوزين ناخد صف الجمهور ونقول أن الفيلم بيقدم جرعة جميلة من التشويق والإثارة وإن كان الفيلم مافيهوش مشاهد أكشن وحركة كتير.
مخرج الفيلم ومؤلفه روبرت وايت حاول يمزج في الفيلم بين الرسالة المستترة والخيال العلمي مع جو من الجاسوسية بدون اللجوء لكتير من الحركة. وكان ممكن يكون الفيلم أفضل لو تم الأهتمام بالمؤثرات والخدع البصرية أكتر من كده. علشان كنا بنشوف كتير من المشاهد اللي بتظهر فيها كائنات خيالية من بعيد وبدون قدرة على التركيز عليها خوفا من فشل الخدع السينمائية بإيهامنا بوجودهم.
الأداء التمثيلي من جون جودمان و فيرا فارميجا و آشتون ساندرز وباقي الأبطال كان جيد جدا وقدر يخاطب المشاهدين على أكتر من مستوى وده يحسب للمخرج اللي قدر يدير الممثلين المسئول عنهم بشكل جيد ومحترف.
أكيد Captive State بعيد جدا عن أنه يكون أفضل فيلم خيال علمي شوفناه. لكنه فيلم يستحق المشاهدة والتركيز في أحداثه وفي الأبعاد التانيه اللي بيقدمها لمشاهديه
