Cats : الفيلم المظلوم؟ ولا الفيلم المٌبالغ في تقييمه؟!
لما نتكلم عن فيلم تقييمه على IMDB هو ٢.٨ من ١٠ وشارك في تقييمه حوالي ٢٠ ألف مستخدم للموقع فا إحنا بنسبة كبيرة هانكون أمام فيلم فاشل جماهيريا بشكل كبير. لكن هل Cats فعلا لا يستحق المشاهدة؟
الحقيقة أن أراء الجمهور والنقاد بخصوص Cats مختلف شوية. لما هاتخرج من الفيلم هاتحس إما أنك شوفت فيلم ممتاز جدا. أو شوفت فيلم سىء جدا. مافيش حلول وسط بخصوص فيلم Cats
Cats بيحكي عن مجموعة من القطط اللي عايشه في لندن واللي بتعبر عن حياتها بالرقص والاستعراض. ثم بتتطور الأحداث معاهم بشكل غير تقليدي.
قصة الفيلم مش مفهومة قوي أو مافيهاش أحداث كتير بتخدمها بشكل أساسي. يمكن لأن المهم بالنسبة للمخرج توم هوبر – واللي بيقدم القصة اعتمادا على مسرحية شهيرة بتتعرض على مسرح برودواي – كان الاستعراض والأغاني والموسيقى.
والحقيقة أن الفيلم قدم على مستوى الموسيقى التصويرية والأغاني وتصميم الرقصات مجهود غير عادي. خاصة مع المؤثرات الخاصة والاستعانة براقصين محترفين. الفيلم في النقطة دي كان ممتاز جدا. لكن نعمل ايه لما تبقى الاستعراضات قوية لكن القصة نفسها ضعيفة جدا!
الأداء التمثيلي من إدريس إلبا و إيان ماكلين و جينيفر هدسون وباقي أبطال الفيلم كان مقبول لكن لم يكن في أفضل حالاته. وزي ما قولنا التركيز الأساسي كان على منطقة الاستعراض والأغاني.
Cats فيلم مُختلف على تقييمه بشكل كبير. البعض بيشوفه فيلم ممتاز وبعض المشاهدين بيقولوا أنهم ماقدروش يكملوه للنهاية ومشيوا في منتصف العرض!
لكن إحنا بنقول لكم أن Cats فيلم جيد لو كنتم من محبي الاستعراضات والرقصات – والقطط طبعا – أما لو متوقعين قصة مختلفة أو أداء تمثيلي قوي. الفيلم هايكون مُحبط لكم.
