Central Intelligence : كوميديا جميلة تناسب الويك إند
بقالنا فترة طويلة ماشوفناش كوميديا جميلة ومعتمدة بالمقام الأول على المواقف الكوميدية بأكتر من أعتمادها على النكات أو القفشات الكوميدية.. الحقيقة إن فيلمنا اليوم بيقدم جرعة كبيرة من الكوميديا مع شوية أكشن بحكم مشاركة الفنان دواين جونسون المشهور عنه أداؤه لأدوار الأكشن.
من إخراج روسون مارشال وبطولة أرون بول ودواين جونسون و كيفن هارت بنشوف قصة حياة رجل هو كيفن هارت، واللى كان نجم المدرسة الثانوية زمان.. وكان زميله (دواين جونسون) مراهق غبي بيسخر الجميع منه.
الفيلم بيقفز بينا بالسنوات لوقتنا الحالى علشان نشوف إيه حصل مع أبطالنا.. اللى حصل هو العكس تماما.. كيفن هارت تحول لمحاسب تقليدي بيعيش حياة تقليدية ومملة، وبيتذكر كل شويه نواياه ورغباته العظيمة أيام الثانوية، ثم بيتقابل مع صديقه القديم (دواين جونسون) اللى كان مثار سخرية من الجميع، فقط علشان يكتشف إنه تحول لرجل مفتول العضلات مهتم بصحته، والأغرب: إنه أصبح يعمل فى المخابرات وبيحاول يوصل لإرهابي قبل ما يبيع سلاح سري… كل ده بإستخدام (كيفن هارت) اللى بيلاقى حياته كلها بتتشقلب امام عينه مفجرة مجموعة لا تتوقف من السخرية والمواقف الكوميدية.
لأول مرة بنشوف المهارات الكوميدية لممثل أكشن كبير بحجم دواين جونسون (الجسدي والفني) أما كيفن هارت فا قدر يستمد دوره الكوميدي من دور صديقه اللى بيشاركه البطولة، وقدر يخلينا نضحك بلا توقف طوال زمن عرض الفيلم، لكن الكوميديا بتتراجع فى الربع الأخير من الفيلم على حساب الأكشن اللى مكانش بنفس القوة اللى كانت عليها الكوميديا.
سيناريو الفيلم متجدد ومتفجر طوال الوقت، وما حسيناش بالملل أبداً بل على العكس كنا فى أنتظار كل حدث جديد علشان نشوف رد فعل كيفن هارت عليه هايكون ازاي، أما الموسيقي التصويرية فكانت رائعة ومتوظفه بشكل مثالى علشان تحسسنا بالأثارة طوال الوقت، وبعض أغاني الفيلم حسينا إننا عاوزين نعرف إسمها علشان نرجع لها تاني ونسمعها على رواقه، وده من وجهه نظرنا من عوامل نجاح الموسيقي التصويرية لأي فيلم.
Central Intelligence فيلم كوميدي جميل وخفيف ننصح بمشاهدته فى الويك اند لنهاية إسبوع كلها حيوية وكوميديا.
