Chappie : الشرطي الالى بثوب جديد

فى واقع الامر، احنا بنعتبر نفسنا من المتابعين الجيدين لسلاسل الافلام اللى بتناقش فكرة (الشرطي الألي).. بيعجبنا طريقتهم فى الكلام، واسلوبهم الألى فى تنفيذ الأوامر، وفى النهاية لازم فكرة ان البشر بكل بطء تفكيرهم واسلوب حياتهم الخاطىء افضل من الشرطي الالى او اكثر قدرة على التصرف فى وقت الشده، مع ان ده مش رأينا احنا فى الحقيقة.

من تأليف واخراج نيل بلومكامب بنشوف ديف باتيل و شارلوت كوبلي فى فيلم اكشن- خيال علمي، عن مستقبل العالم لما بتقدر احد الشركات تصنع مجموعة من الروبوتات الشرطية الذكية، واللى بيتم استعمالها لحفظ الامان بدون الخوف من خسارة الارواح، لكن بيتم ضرب احد الروبوتات (تشابى) فى احد العمليات، ولكن بدلا من اعادة تصنيعه، بيقوم احد العلماء بزرع عقل صناعي متقدم فيه، واستعماله من اول وجديد فى ظل احداث متغيرة وظروف متطورة مش عاوزين نحرقها عليكم.

قصة الفيلم لم تكن بنفس القوة اللى توقعناها، واى فيلم بيناقش فكرة الشرطي الالى تعتبر افضل من فيلم اليوم، كمان الحبكة القائمة على الغيرة كانت غير منطقية على الاطلاق، وكانت مقتصره على مجرد حشر فكره ادخال روبوت اخر للفيلم، وايضا العلاقة الانسانية بين الروبوت (تشابى) و فتاة العصابة، وتحولها من مجرمه الى ام لها عواطف ايجابيه تجاهه كانت غير منطقيه.. ودي النقطة اللى عاوزين نتكلم عنها باستفاضه.

الفيلم مش عارف هو عاوز يقول ايه بالظبط! مش عارف هو عاوز يصدر اى صوره عنه للمشاهد؟! هل هو فيلم للروبوت الشرطي بكل ما تحمله الكلمة من معاني الاكشن والمطاردات والقتل بلا رحمه؟ الاجابه : لا .. هل هو فيلم عن الذكاء الصناعي والفرق بينه وبين مشاعر الانسان؟ الاجابه لا! هل هو فيلم عن كائنات ضخمه بتتصارع ضد بعضها زي افلام (جودزيلا) وغيرها؟ الاجابه لا! الفيلم كان عاوز ياخد SEGMENTمن كل جزء من القصص دي، وكانت النتيجه : فشل ذريع على كل الاصعده!

الموسيقي التصويرية كانت عاديه، لكن الديكورات كانت قوية ومتميزه، وصورت الشوارع الخلفية للمدن الامريكيه بشكل متميز، ايضا الخدع ومشاهد الروبوتات ايضا كانت قويه، لكن التصوير والزوايا لم تكن بالقوة اللى توقعناها.

اختصارا للأمر : بننصحكم تنتظروا الفيلم للمشاهده على القنوات الفضائية، لانه لا يستحق تضييع الوقت والمال فى تذكرة السينما