Charlie’s Angels : نحن نكره الرجال ونصنع أفلام سينما!
واضح أن سيطرة المرأة على هوليود أصبحت هي “الترند” الجديد بعد كراهية العرب، واللي سرق السجادة من تحت ترند كراهية الروس اللي كان مسيطر في فترة الثمانينات والتسعينيات! وده اللي بنلاحظه من أفلام زي Charlie’s Angels
Charlie’s Angels بيحكي عن مهمة جديدة لمجموعة “فتيات تشارلي” المدربات على استخدام العنف والخديعة وأعمال المخابرات لحماية العالم من جهاز سري جديد. لكن المرة دي وعكس الجزء السابق مافيش “تشارلي” ذكر علشان يتحكم في البنات ويعطيهم أوامر.. إحنا خلاص في عصر تمكين المرأة!
الطابع الأنثوى واضح على الفيلم. بداية من فريق العمل اللي كله سيدات ونهاية بظهور الرجال الباهت في الفيلم واللي بيظهروا طوال الوقت في صورة الأشرار اللي بيخسروا طوال الوقت أمام “ملائكة تشارلي”
كان نفسنا في ممثلة ثقيلة من حيث الوزن التمثيلي علشان تشيل مسئولية البطولة في الفيلم. مع كل احترامنا لكرستين ستيوارت و إيلا بالينسكا و ناعومي سكوت لكن الفيلم كان محتاج بطلة أفضل وأكبر من حيث الخبرة التمثيلية والشهرة علشان تحقق بعض التوازن في الفيلم.
من الحاجات اللي كانت ضعيفة في الفيلم الحوار اللي كان غير منطقي وفيه جُمل كتير محطوطة بس علشان تُستعمل في التريلر أو تثير الضحك بدون أي تفكير في مدى منطقية الحوار. وده من الأمور اللي ضايقتنا.
لكن الفيلم مكانش كله سلبي. مستوى الكوميديا في الفيلم جيدة، وإخراج مشاهد الأكشن كان مُلفت للنظر ومسلي. والفيلم بشكل عام خفيف ومفهوم ومش هايخرج المشاهدين منه وهم عندهم شعور بالملل.
Charlie’s Angels فيلم يصلح لمشاهدة سريعة في نصف الأسبوع لو عاوز فيلم خفيف ومضمون. أو لو كنتم طبعا من أنصار قضايا المرأة خصوصا كفاحها في الوصول لأدوار قوية في هوليود!
