Cinderella : أسطورة الحذاء الزجاجي
مين قال ان قصص زي سندريلا وذات الرداء الأحمر وغيرها من القصص ممكن نزهق منها؟! هو ده الاسلوب اللى بتتبعه ديزني لتحقيق الارباح المضمونه، انها تعيد انتاج القصص الاسطورية المحفوظه ومضمونة النجاح وتقدمها للمشاهد مرة اخري.. لكن هل الموضوع بالسهولة دي؟!
الاجابه هي لا.. بدليل قدر الابهار اللى شاهدناه فى نسخة 2015 من قصة سندريلا الاسطورية، اللى بنشوفها النهرده من وجهه نظر المخرج كينيث براناه ومن بطولة المتميزه كيت بلانشيت و ليلي جيمس اللى بتقوم بدور سندريلا.
هل محتاجين نحكي لكم القصة؟ الحقيقة لاء.. لكن ممكن نعتبر ان واحد بس مش عارف القصة فا نختصرها له ونقول له ان الفيلم بيحكي عن قصة البنت اللى كانت عايشه حياه مرفهه لحد ما والدتها بتموت، وبعد فتره بيتزوج والدها من ست شريرة وبناتها القبيحات، ثم بيسافر فى رحله طويله وبيتوفى خلالها، ومن بعدها بتبدأ زوجة الأب فى اساءة معاملة البنت . لحد ما بيقرر الأمير عمل حفله لاختيار زوجه.. وساعتها بتختلف الأحداث تماما.
بما ان القصة مكررة، كان لازم ديزني تلعب على عوامل اخري لنجاح الفيلم.. الموسيقي التصويرية مثلا اللى كانت متميزه جدا.. والمؤثرات الخاصة اللى حولت الفيلم للوحة فنية متميزه عجبتنا جدا، وخصوصا فى مشاهد الانفجارات والسحر. لكن للاسف كل ده لم يمنع تسرب احساس بالملل عندنا لان القصة مكرره، ولم يتم اضافه اى جديد او تقديم اى معالجة خاصة للاحداث.
الاداء التمثيلى لـ(ليلي جيمس) فى دور سندريلا كان ضعيف وهزيل، ولم يقدم اى جديد للشخصيه، ايضا مستوي جمالها فى الفيلم كان لا يضاهي الجمال اللى بنتخيله فى دماغنا لسندريلا، على العكس من الشخصية الشريرة كيت بلانشيت فى دور زوجة الام اللى كان ادائها اكتر من مذهل وده مش جديد على (كيت) اللى تميزت فى ادوار كتير ومتعددة منها على سبيل المثال لا الحصر دورها فى فيلم Babel اللى أدت فيه شخصيه سوزان.
لو لسه ماتعرفش حاجه عن (سندريلا).. او لو كنتي رومانسية جدا .. او لو كنتم عاوزين تسيبوا الاولاد فى مكان أمن لمدة حوالى ساعتين.. سندريلا 2015 من ديزني قد يكون فيلم مناسب لكم جدا.
