Coco: خليك ورا حلمك لحد ما تحققه

أصبح لوجو شركة بيكسار العالمية المتخصصة في انتاج أفلام الأنيميشن زي الختم الجودة اللي لما بنشوفه على فيلم بنعرف أننا هانتفرج على فيلم مختلف على مستوى الصورة أو حتى القصة والأداء. تعالوا نتعرف أكتر على Coco

القصة

الفيلم بيحكي عن طفل صغير مهووس بالموسيقى وبيحلم يكون عازف مشهور. وفي يوم من الأيام بيقرر يزور ضريح الموسيقار المفضل له والمدفون في المكسيك، وهناك بيزور الضريح في يوم الموتى في المكسيك وهو أحتفال مشهور زي عيد قومي مكسيكي. وهناك بيقابل بطلنا أقاربه الموتى وبيدخل في سلسلة من المغامرات اللي بيعيد فيها اكتشاف نفسه ومعرفة حقيقة قدراته.

فريق العمل

الفيلم من أخراج وتألي أدريان مولينا و  لي أونكريتش وبطولة الأداء الصوتي لـ  جايل جارسيا برنال و  بنجامين برات و رينيه فيكتور و أنطوني جونزاليز و إدوارد جيمس أولموس

الأداء الصوتي

يمكن الأداء الصوتي في الفيلم كان واحد من أفضل العوامل اللي تساعد على نجاحه، وده لأن كل شخصية من الشخصيات كانت عارفه بالظبط المطلوب منها، وقدرت تعبر عن مشاعرها باستخدام صوتها بشكل متميز ونقل لنا روح الفنانين وروح الشخصيات الكرتونية اللي بيقوموا بيها.

السيناريو والحوار والأخراج

سيناريو الفيلم كان بطىء شويه في النصف الأول من الأحداث وده من العيوب اللي بنعيبها على الفيلم، لكن بعد كده بياخدنا في جولة مبهرة ومتميزة سواء على مستوى الصورة اللي كان واضح فيها المجهود الأخراجي والأهتمام بكل تفصيلة من التفاصيل زي ما عودتنا بيكسار أنيميشن دايما.

الرسومات والموسيقى والتحريك

رسومات الفيلم زي ما قولنا تتميز بدقة شديدة وتركيز على أبسط التفاصيل، كمان من الواضح التميز على مستوى الخدع وأسلوب تحريك الشخصيات على الشاشة أن كان في اهتمام من بيكسار أنها تنقل تفاصيل حياتنا الواقعية للشاشة، بالأضافة لكتير من التحسينات اللي اتعودت بيكسار انها تبهرنا بيها في كل أفلامها تقريبا.

الموسيقى التصويرية للفيلم كانت جيدة لكن في رأينا كنا نحتاج أنها تكون أفضل من كده، أو أكثر ملائمة للمواقف اللي بتدخل فيها علينا الموسيقى بشكل حسينا انه ممكن يكون مزعج بعض الشىء.

الخلاصة

فيلم Coco واحد من أحلى أفلام الأنيميشن اللي شوفناها مؤخرا واللي تناسب مشاهدته الكبار أو  الصغار على حد سواء.

علشان تبقى عارف:

تقييم الفيلم 9 من 10 على موقع IMDB