Code 8 : أصحاب القدرات الخارقة مش في نعيم

إحنا متعودين دايما نشوف أصحاب القدرات الخاصة – زي سوبر مان أو سبايدر مان – وهم بينقذوا المجتمع ويحاربوا الجريمة والكل يعاملهم باحترام. لكن في Code 8 بنشوف أصحاب القدرات الخارقة وهم مطاردين من الشرطة وبيتعرضوا للإضطهاد.

على الرغم من سهولة قصة Code 8 لكن مانقدرش نحكي عنها كتير بدون حرق للأحداث علشان كده هانكتفي بالقول أن الفيلم بيحكي عن واقع مغاير لأصحاب القدرات الخارقة وازاي ممكن يكونوا اشخاص مطاردين ومطلوبين.

الأداء التمثيلي لأبطال الفيلم ستيفن أميل و جريج بريك و روبي أميل كان جيد. لكن من ناحية تانيه كنا محتاجين سيناريو أقوى يوظف الأداء التمثيلي ده بشكل أحسن. وبشكل عام حسينا بانفصال بين إخراج جيف تشان وبين سيناريو كريس بار بشكل أضر بالفيلم وكان غير مفيد بالنسبة لنا كمشاهدين عاوزين أحداث نقدر نتابعها بشكل جيد.

لكن من ناحيه تانيه توظيف الخدع السينمائية كان جيد واستخدامها كان قليل شوية من حيث الابهار لكن من ناحية تانيه تقليل استخدام الخدع السينمائية كان أفضل بالنسبة للمشاهدين اللي زهقوا من ابهار مارفل و DC وعاوزين فيلم عن الأبطال الخارقة لكن بمنظور مختلف شويه.

Code 8 أكيد مش أحسن فيلم عن أصحاب القدرات الخارقة. لكنه فيلم جيد تقدروا تقضوا أمامه حوالي ساعتين بدون ملل. وبدون توقعات ضخمة.