Cold Blood : حتى القتلة المحترفين عندهم قلب!

لو كنت بتتزحلق في يوم على الجليد في منطقة مهجورة وحصلت لك حادثة. يبقى من حظك الحلو أنك تقع قدام كوخ فيه رجل وحيد… لكن لو كنت في فيلم Cold Blood الرجل الوحيد ده هايكون قاتل محترف!

فيلم Cold Blood من الأفلام اللي قصتها ممتازة وفكرتها ينفع يخرج منها فيلم قوي وحيوي جدا.. لكن التنفيذ الضعيف والحوار الغير حقيقي وأخطاء السيناريو كانوا كفيلين بإسقاط الفيلم من وجهة نظرنا.

زي ما قولنا الفيلم بيحكي عن قاتل محترف عايش في كوخ منعزل بين الثلوج بيصادف أنه بيلاقي بنت محتاجه مساعدة، ومن هنا بنبدأ نشوف تغير في شخصيته بين راجل مهمته قتل الناس وبين رغبته في انقاذها ومساعدتها.

لكن مع استمرار الأحداث بنحس أن السيناريو مش قادر يركز على الأحداث. الحوارات مش مقنعة ومش بتشرح خلفية الشخصيات بشكل صحيح. وفي النهاية حسينا أن الفيلم فيه فجوات كتير مطلوب اننا كمشاهدين نتخيلها ونكمل  احداثها بنفسنا!

لكن المميز في الفيلم كان الأداء التمثيلي لجان رينو.. رينو من الممثلين اللي شغلهم قليل لكن موهبتهم عالية وعارفين يقدموا شغل متميز من حيث الكيف أكثر من الكم.

كمان عجبنا جدا اختيار أماكن التصوير وفكرة الانعزال بين الثلوج أغرتنا بتجربتها خاصة أن زوايا تصوير المشاهد دي في الفيلم كانت جيدة جدا وخلتنا نحس بالاندماج في الأحداث.

Cold Blood فيلم من النوعية اللي لو كان تم الاهتمام بالسيناريو بتاعها اكتر من كده كان ممكن نشوف فيلم قوي ومميز وقادر على المنافسة.