Cold Pursuit : هل هايفشل الفيلم بسبب تصريحات بطله؟!
ضجة كبيرة أثارها العرض الخاص لفيلم Cold Pursuit واللي تم إطلاقه مؤخرا في السينمات، وسبب الضجة هي تصريحات بطل الفيلم ليام نيسون واللي صرح أنه بعد تعرض حبيبته للإغتصاب كان عاوز يفتعل شجار مع أي شخص أسود علشان يقتله. وأنه شعر بالندم بسبب تفكيره بالشكل ده.
وحتى مع إعلانه الندم على طريقة تفكيره، اتهامات بالعنصرية طاردت ليام طوال الوقت وتسببت في الغاء عرض الفيلم الخاص.
Cold Pursuit بيحكي عن رجل بيعمل بجد في مجال كسح الثلوج. وبيحصل على تكريم واهتمام واحترام كل اللي يعرفوه. لكن الظروف الغامضة لوفاة إبنه بيخليه يتتبع أثار عصابة خطيرة لتهريب وتجارة المخدرات. ويبدأ ينتقم منهم واحد واحد.
بنعيب على الفيلم أنه بيتناول تيمة الانتقام برتابة واضحة. وبدون أي محاولة للتجديد أو لتقديم أي أحداث أو حبكة جديدة. بالتالي المشاهدين كانوا قادرين على استنتاج كل أحداث الفيلم تقريبا. لكن من ناحية تانيه ماينفعش ننكر أن تيمة الأنتقام في حد ذاتها بتحرض المشاهدين على متابعة المشاهدة للنهاية
على الرغم من تقدم بطل الفيلم ليام نيسون في العمر (حوالي 67 سنة) إلا أنه قدر يقدم مشاهد الأكشن الخاصة به بشكل جيد جدا، وده يرجع لقدرة المخرج هانس بتر مولاند على توجيهه بشكل صحيح ومناسب.
Cold Pursuit فيلم مناسب للناس اللي عاوزه تتفرج على فيلم بدون تشغيل مخ كتير. مع تيمة انتقام واضحة ومباشرة ومثيرة في نفس الوقت