Collide: فيلم أكشن مالوش حل!
ياترى ممكن تعمل ايه علشان الإنسانة اللي بتحبها؟ والى أي درجة مستعد تضحي علشانها؟ وايه الحدود اللي هاتقف عندها وتقول انا مش هقدر أكمل أكتر من كده؟ هو ده السؤال الأساسي اللي ها يخطر ببالك لما تتفرج على فيلم Collide، واللي بنعتبره واحد من أفضل أفلام الأكشن اللي شوفناها مؤخرا. تعالوا نتكلم عن الفيلم بالتفصيل.
فريق العمل
الفيلم من تأليف وإخراج إيران كريفي ومن بطولة نيكوﻻس هولت و فيليستى جونز و أنتوني هوبكنز و بن كنجسلي و توماس بيندر.
ومن الأمور الجيدة في الفيلم أن المخرج هو نفسه المؤلف، وبنلاحظ أن الأفلام اللي مؤلفها بيكون مخرجها بتكون أقوي لأن المخرج في الحالة دي بيكون عنده تصور شامل ووافي للفيلم لأنه كاتب القصة أيضا. وده اللي حصل في حالة Collide
القصة والسيناريو والحوار
سيناريو الفيلم بيبدأ بمشهد مطاردة سيارات عنيفة جدا، وبينتهي بحادث بيصاب فيه بطل الفيلم (نيكولاس هولت) إصابة بالغة. ومن هنا بيبدأ بطل الفيلم (كايسي) إنه يحكي ازاي تطورت القصة علشان توصل للنقطة دي.
الأسلوب ده في كتابة السيناريو أسلوب مميز جدا، لأنه بيخلي المشاهد في حالة من الترقب الشديد علشان يعرف ازاي الأمور وصلت للحظة دي. ومن ثم بيبدأ المشاهد في استكمال الأحداث من لحظة التوقف. والحقيقة أن Collide قدر يعيشنا في حالة من الترقب من أول لحظة لأخر لحظه.
أما عن الحوار في الفيلم فكان رائع، وبيقدم كتير من الحوارات الفلسفية العميقة، اللي لم نكن نتوقعها في فيلم أكشن المفروض يكون خفيف. لكن الحقيقة الحوار كان متميز جدا، وخاصة الحوار المكتوب لأنتوني هوبكنز، واللي كان كل جملة بيقولها تقريبا متميزة وفى محلها تماما.
الإخراج والتصوير
إخراج الفيلم كان متميز جدا، ولعب على اثارة التشويق للحد الأقصى، أما عن إخراج مشاهد الأكشن فكان الفيلم متميز جدا، وكان واضح الاستخدام الرائع للمؤثرات الخاصة لإضافة بعد فلسفي كان واضح في كتير من المشاهد، زي مشهد انقلاب السيارة في المطاردة الأخيرة في الفيلم، وغيرها من المشاهد اللي إخراجها أقل ما توصف به أنها متميزة الى اقصي درجة.
الموسيقي والديكور
ديكورات الفيلم كانت متميزة جدا، والكاميرا كانت بتعمل كادرات رائعه، لكن بنعيب على الفيلم ضعف الموسيقى التصويرية، وحتي الديكورات على الرغم من تميزها كان المفروض تكون أفضل من كده. ونقدر نقول أن الموسيقى التصويرية والديكورات مش بنفس قوة القصة والإخراج وحركة الكاميرا.
الخلاصة
Collide واحد من أحسن أفلام الأكشن اللي شوفناها مؤخرا، وبنوعدكم بقضاء حوالي ساعتين من التشويق المستمر والإثارة المتميزة.
علشان تبقي عارف:
تصنيف الفيلم في الولايات المتحدة PG13 لبعض المشاهد الجنسية والشتائم ومشاهد المخدرات.
