Concussion : الصراع بين الطب والبيزنس
بمناسبة اقتراب موعد حفل توزيع جوائز الأوسكار، فيه سؤال مهم اصبح يطرح نفسه فى الأوساط الفنية.. ياتري فين نصيب الفنانين السود من الجوائز؟ وليه مش بيتم النظر لأعمالهم بإهتمام أثناء بحث الجوائز والترشيحات المختلفة؟ نعتقد إن ويل سميث كان هايكون واحد من أهم الأسماء المرشحة لنيل الجائزة لو كانت الأوسكار بتتمتع ببعض الإنصاف.. وفيلمه الأخير Concussion أكبر دليل على ضرورة إعادة النظر فى الجوائز اللى بتقدمها الأوسكار وترشيحاتها المختلفة.
من إخراج بيتر لانديز مان وبطولة ويل سميث و اليك بالدوين و البرت بروكس بنشوف قصة طبيب متخصص فى التشريح من أصول أفريقية، له طريقة مختلفة وجديدة فى التشريح، بتوريهالنا المشاهد الإفتتاحية للأحداث، واللى بيقدر من خلالها يوصل لإستنتاجات مهمه بتفيد عمل المحاكم اللى بتحقق فى جرائم القتل على سبيل المثال.
دكتور (أومالو) بيبدأ يكتشف مجموعة من الأعراض المميزة لأبطال الكره فى الولايات المتحده، كل الحالات إنتهت بالإنتحار والمثول بين يديه على ترابيزه التشريح، وبالتالى بدأ فى ملاحظه ضرر معين بتحدثه الضربات اللى بتتلقاها الدماغ فى اللعبه العنيفه دي.. ومع بداية نشره لنتائج أبحاثه فى الوسائل العلمية الطبية، بتقوم الدنيا ومش بتقعد، وبيبدأ يتعرض لضغوط من إتحادات اللعبة اللى بيشوفوا فى تصريحاته وأبحاثه إضراراً شديداً بعملهم وبالبيزنس اللى بيديروه من وراء اللعبة الأكثر شعبية فى الولايات المتحده!
الأداء التمثيلي لكل الأبطال كان اكثر من رائع، ويل سميث –كعادته- متميز وقادر على تملك زمام شخصيته بداية من اللهجة الخاصة اللى بيتبعها فى الكلام ونهاية بالملابس وطريقة تصفيف شعره واسلوبه وحركه جسده.. كل حاجه فى ويل سميث فى الفيلم كانت بتذكرنا طوال الوقت اننا امام الدكتور اومالى مش امام الفنان ويل سميث.. وده شىء يحسب له بالطبع.
الموسيقي التصويرية كان لها دور كبير ومهم فى الأحداث، ويمكن ظهرت بشده فى مشهد الرقص يوم الإحتفال.. موسيقي هادئة ومتصاعده ومؤثرة على سياق الأحداث بقوة وبدون ما تفقد موقعها الرئيسي فى خلفية الأحداث.. الموسيقي هنا كانت عارفه المفروض تظهر امتي وتختفى امتي علشان تسيب المشاهد يركز فى المشاهده ومايتفصلش عنها.
Concussion من الأفلام اللى ممكن كلامنا عنها يكون قليل، لكنها تستحق المشاهدة والتقييم والإهتمام والتركيز اثناء مشاهدتها، طبعا غني عن القول اننا نقول ان الفيلم مقتبس عن أحداث حقيقية وده بيعطي للمشاهدة متعه اكبر ومحاولة اكثر للتركيز والبحث عن الشخصيات الحقيقية للفيلم.
