Cop Car : لعبة تحولت لكارثة
مين قال ان الافلام منخفضة الميزانية لازم تكون منخفضة الجودة كمان؟ الحقيقة ان هوليود بتشهد عدد كبير من الافلام منخفضة التكلفة وفى نفس الوقت بتقدم حالة سينمائية خاصة ومجنونة، وقدرة عالية على استغلال السيناريو لتحقيق اعلى قدر ممكن من النجاح… ده بيحصل مع افلام زي Everly او Desperado قديما .. ونفس الكلام بيتكرر مع Cop Car
من اخراج جون واتس وبطولة كامرين مانهايم و كيفين بيكون و شيا ونجهام و جيمس فريدسون بنشوف قصة طفلين فى نهاية الطفولة وبداية المراهقة، بيحاولوا يستكشفوا الدنيا حواليهم، وبيعثروا بالصدفة على سيارة شرطة خاصة برجل شرطة فاسد.
على الرغم من بساطة الموقف فى الظاهر، الا ان الاحداث اللى بتترتب على اختفاء السيارة وقيام الولدين هاريسون وترافيس (جيمس فريدسون جاكسون) و (هيس ويلفورد) بسرقة السيارة… بتاخد الفيلم لمنحني طويل من الغموض والاثارة.
الاداء التمثيلي للبطل البالغ الوحيد فى الفيلم تقريبا الا وهو كيفن باكون، كان متميز وقوي جدا، مع تعبيرات وجهه المرعبة وقدرته على تغيير شكله واداؤه التمثيلي بشكل قوي ومتميز.
على الرغم من الملل اللى ممكن يتسرب للنفس فى منتصف احداث الفيلم، الا ان كل مرة كنا نحس ببعض الملل المخرج جون واتس كان بيعطينا مشهد يجعلنا نقفز تاني لمنتهي التحفز، زي المشهد الصامت اللى بيظهر فيه الاطفال بيلعبوا بالاسلحة النارية.. وهو المشهد اللى خلانا نشعر بالهلع لمدة ثواني معدودة هى عمر المشهد.
الفيلم بيلقى ظلالا بالغة القتامة على العلاقات الاسرية، وضرورة متابعة الاهل لاطفالهم، وحالة التفكك الاسري اللى بتعاني منها الولايات المتحدة ونشأة جيل كامل من الاطفال دون رقيب او حسيب، كمان الفيلم بيتكلم بشكل مستتر عن ازمة بيع السلاح للاطفال والمراهقين، والحوادث اللى حصلت مؤخراً كانت خير دليل على ان التلميحات اللى بيقولها الفيلم طوال الوقت كانت فى محلها.
تصوير الفيلم الغالبية العظمي من مشاهده فى مناطق جبلية صحراوية مفتوحة كان له اثر مريح على العين، كنا فقط محتاجين زوايا واسعه فى التصوير اكتر من كده.. كمان التصوير فى الصحراء اكسب الوان الفيلم تغيير واضح عن نغمة الازرق والرمادي اللى اصبحت غالبه فى معظم الوان المشاهد فى هوليود حاليا.
Cop Car قد لا يكون افضل فيلم تشويق واكشن شوفناه.. لكن بالمقارنة لميزانيته.. نقدر نقول انه فيلم ناجح ويستحق المشاهدة
