Countdown : ماتنزلش الأبليكيشن ده!
فكرة أفلام الرعب المعتمدة على التكنولوجيا الحديثة من النوعيات اللي بتعجبنا، لأنها بتدينا فكرة عن تطور تيمات الأفلام مع تطور المجتمعات والتقنيات الحديثة. وهو ده اللي لعب عليه فيلم Countdown لكن هل نجح؟
فيلم Countdown بيحكي عن أبليكيشن على التليفونات الذكية بيحدد لكل واحد التاريخ اللي هايموت فيه! ومع اقتراب الوقت بيزيد شعور كل واحد أن فعلا النهاية قربت وبيبدأ يحاول يهرب من مصيره المحتوم.
على الرغم من أن قصة الفيلم مبتكرة الى حد ما لكن الأداء التمثيلي من إليزابيث ليل و جون بيشوب و جوردان كالواي وباقي أبطال الفيلم كان ضعيف الى حد ما. بس الحقيقة ده مش ذنبهم. الذنب كان في تأليف وإخراج جاستين ديك اللي فشل في إضافة ابعاد إنسانية على الشخصيات. بالتالي حسينا أن مافيش رابط بيننا وبين الشخصيات اللي بنتفرج عليها على الشاشة.
الأسوأ أن جاستن ديك حاول يطعم الفيلم ببعض الكوميديا مع بعض التشويق. لكن في النهاية الخليط ده كان غير مقنع. يمكن بسبب الميزانية القليلة للفيلم واللي لم تساعد (ديك) على انه يخلي الفيلم يطلع بالشكل اللي هو عاوزه.
لو كنت من محبي أفلام الرعب حتى منخفضة الميزانية منها فيلم Countdown هايعجبكم خاصة أنه بيجمع بين التكنولوجيا الحديثة مع الرعب وبعض الكوميديا.
