Crawl : مش عارفين نجيبهالك ازاي.. بس التمساح في شقتك!
فيه نوعية أفلام تخليك مش قادر تاخد نفسك من فرط الترقب والانتظار. الأفلام دي مش أقوى أفلام في العالم. لكن صناعها قادرين على ضبط سلسلة من الأحداث اللي بتاخدك من مفاجأة للتانية علشان تنسى حاجة اسمها ملل أو عدم رغبة في متابعة الأحداث Crawl من نوعية الأفلام دي.
Crawl بيحكي عن هالي (كايا سكوديلاريو) اللي بتتجاهل التحذيرات بضرورة عدم التواجد في منطقة بيضربها أعصار شديد في أمريكا. وبتحاول تنقذ والدها بعد ما بتلاقيه محتجز في منزله ومنسوب المياه بيزيد. لكن مع الوقت بتكتشف أن موضوع منسوب المياه ده أقل مخاوفهم. المنزل فيه تماسيح كمان!
زي ما قولنا سيناريو الفيلم أكثر من رائع ومافيهوش لقطة ملل واحدة. إخراج ألكسندر أجا قدر يوظف السيناريو بشكل ممتاز لصالح الفيلم، على الرغم من أنه بيشتغل في ميزانية محدودة وده كان واضح من قصر الديكورات على أماكن قليلة قدر الإمكان.
على الرغم من استخدام تقنيات المؤثرات الخاصة في الفيلم في مشاهد التماسيح لكن ما حسيناش أن المشاهد ملعوب فيها. وفي بعض المشاهد تم استغلال الإضاءة علشان تداري على أي تلاعب. وأي ثغرة في مشاهد المؤثرات الخاصة تم تعويضها بأداء تمثيلي أكتر من رائع من كل ابطال الفيلم خاصة كايا سكوديلاريو و مورفيد كلارك و باري بيبر واللي قدروا يقدموا أداء تمثيلي رائع ومؤثر جدا.
Crawl فيلم صناعه عارفين نقط قوته وضعفه كويس جدا. وبيستغلوا نقاط قوته علشان يداروا على نقاط الضعف ويحولوا كل مشهد من مشاهده لفيلم جميل ممتع ويستحق المشاهدة
