Criminal : عالم زراعة الذكريات
فى منتصف الحرب العالمية الثانية، وقع طيار ألماني فى أيدي الأمريكان، وفكرت المخابرات أيامها فى خدعة جديدة لإستجاوب الطيار، وهى إيهامه بإن الحرب العالمية إنتهت وإن السلام أصبح يعم العالم وخاصة بين أمريكا وألمانيا، وفعلاً تم تجهيز ديكورات وممثلين لحبك الدور، وصدق الطيار الخدعه وأدلى بكل المعلومات بدون تعذيب.
على الرغم من عدم تشابه سيناريو القصة دي مع سيناريو فيلم Criminal بنسبة 100%، إلا أن القصة لا تزال متشابهة، لكن فيلم اليوم قدم الفكرة بشكل أكثر خياليه، وإن كان أكتر متعة وتشويقاً.
من إخراج اريل فرومين وبطولة كيفن كوستنر و جاري اولدمان و رايان رينولدز وغيرهم من الفنانين، بنشوف قصة عميل للسى أي ايه، بينطلق فى مهمة للبحث عن مجرم دولى غامض، قبل ما يتسبب فى إندلاع حرب عالمية جديدة… لكن العميل بيتعرض للقتل، وبتصبح المهمة الوحيده للسى اي ايه علشان يقدروا يكملوا المهمة، هى القيام بعملية زرع ذكريات العميل المتوفى فى جسد مجرم خطير (كيفن كوستنر) علشان يقدروا يمنعوا العالم من الوقوع فى كارثه محققه.
زي ما شوفنا الفيلم بينتمي لأفلام الحركة والذكاء والإثارة، بمعني إننا مش بننتقل من مشهد حركه للتاني بدون تمهيد، بل على العكس الاكشن فى الفيلم كان مبرر وله اسباب قوية ومنطقية وبيتم التمهيد له من خلال إدارة لعبة فى منتهي الذكاء، لكن فى النهاية الفيلم مش بيقدم قصة جاسوسية بقدر ما بينتمي أكتر لفئة الأكشن والحركه.
وبما اننا بنتكلم عن الحركه، لازم نتكلم عن إخراج مشاهد الحركه اللى كان اكتر من رائع، وكان من الواضح ان الفيلم مرصود له ميزانيه ضخمه لانتاجه لاننا شوفنا مشاهد مطاردات وانفجارات متميزه ومتعوب عليها ومافيش بخل انتاجي.
يمكن العيب الوحيد فى الفيلم من وجهة نظرنا، الملل اللى كان بيصيبنا أحيانا فى مشاهد الإنتقال بين العمليات أو المطاردات، لكن بشكل إجمالى نقدر نقول إن الفيلم مستواه جيد.
Criminal فيلم أكشن جميل يستحق المتابعه لعشاق النوع ده من الافلام.
