Crimson Peak : الكأبة اكثر من الرعب
ايه اللى ضايقنا من الفيلم اكتر من الرعب اللى كان شبه منعدم؟ الكأبة اللى كانت بتطل من كل مشهد.. من البداية للنهاية، والاحساس العام اللى تسرب لنا ان الفيلم ليس فيه اي شىء يدعو لاي مشاعر غير الكأبة.. اللهم الا مشاهد الاشباح اللى تم صنعها بجرافيك ضعيف متهالك.. وخيط رومانسى ضعيف جداً تسرب لنا خلال الاحداث.
الفيلم بيتبع مدرسة فى الرعب قائمة على الرعب من الاماكن الحية او القائمة بذاتها.. المنازل اللى بيلفها الغموض وبتسكنها اشباح وقدرات خارقة وغير عادية، مع استعمال اساليب تصوير واضاءة خافتة وتسرب لنفسنا حالة من الكابة الختلطة بالغموض.. لكن الرعب كان غائب عن الخلطة السينمائية. ولو كان موجود بنسبة اكبر كان هايكون لنا تقييم مختلف للفيلم.
من اخراج جيليرمو ديل تورو وبطولة توم هيدليستون و جيسيكا تشاستين و ميا واسيكوسكا و بيرن جورمان بنشوف احداث قائمة على مؤلفة بتحاول تبدأ حياة عملية جديدة بتضطرها لمقابلة رجل نبيل ارستقراطي هو توم هيدليستون واخته اللى بتعيش معاه فى منزل غريب وملفت للنظر وشبه (حي) وقائم بذاته تماما! ومن هنا المفروض بيتولد الرعب.
لا نخفى عليكم شعورنا بالملل خصوصا فى الجزء الاول من الفيلم، وحسينا ان الاحداث بيتم مطها بصعوبة لمحاولة زيادة زمن عرض الفيلم، الامر اللى ضايقنا واشعرنا بالاستغلال خصوصا مع احساسنا ان الفيلم بالكامل كان يستحق مشاهدة منزلية فى اجازة نهاية الاسبوع باكثر من التوجه للسينما لمشاهدته.
الرعب كان هايكون اكتر لو لم يكن تم الاعتماد على المؤثرات الغريبة والاقرب للكرتونية، ولو تم الاعتماد على الرعب المنسجم مع المكان وزوايا الاضاءة والتصوير كانت النتيجة هاتكون افضل من كده بكتير.
على الرغم من تميز الصورة بشكل عام فى الفيلم، واحتواء الفيلم على مشاهد متميزة وغنية بالتفاصيل، الا ان للاسف ضعف القصة واعتمادها على الكأبة فى جزء كبير منها افشل الخلطة النهائية للفيلم وجعل تميز الملابس والديكورات والموسيقي وباقى عناصر الفيلم يقفوا عاجزين عن انهاء المعادلة بشكل جيد بالنسبة للمشاهد النهائى البسيط واللى دخل الفيلم وكان متوقع انه هايتفرج على فيلم رعب.. لكن الحقيقة ان الفيلم فى النهاية طلع فيلم كئيب.. والفرق بين الفيلم المخيف والفيلم الكئيب زي الفرق بين السماء والارض! وان كانت الحسنة الوحيدة للفيلم هى قدرته على نقلنا لأجواء القرن 19 بنجاح.. لكن هل دي الحسنة الوحيدة اللى ممكن بسببها نحترم فيلم.. المفروض انه فيلم رعب؟!
