Daddy’s Home : كوميديا صراع الأباء!
الحقيقة وقبل كل شىء، احنا متضايقين اننا بنكتب ريفيو لفيلم كوميدي فى يوم تشييع جنازة الفنان الراحل الجميل ممدوح عبد العليم.. اسرة كايرو360 بتدعوا له بالرحمة وبتتمني لأهله الصبر والأحتمال ولمحبيه فى مصر والعالم العربي خالص التعازي.
مين قال انك محتاج فكرة جديدة ومبتكرة علشان تقدم فيلم كوميدي؟! احيانا بيكون طريقة تقديم الفكرة القديمة بحد ذاته معيار كافى جداً للحكم على الفيلم الكوميدي بالنجاح، أو نقول لكم من الاخر؟ مش مهم خالص تعملوا قواعد ثابته لاستمتاعكم وانبساطكم… الكوميديا فى الفيلم ده هاتفرض نفسها على كل شىء وهاتخليكم تضحكوا لمدة حوالى ساعة ونصف هى عمر الفيلم.
من اخراج شين اندريز وبطولة ويل فاريل و مارك ويلبرج –واللى بيتعاونوا للمرة الثانية بعد فيلم The Other Guys وبيشاركهم البطولة توماس هادن شيرش و ليندا كارديليني بنشوف قصة معركة بين الأب البيولوجي والأب الجديد لطفل وطفلة صغيرين.. المعركة بتنشأ نتيجة رغبة كل واحد فيهم استمالة الأطفال له بالمقام الأول، الأمر اللى بيفجر مجموعة من المواقف الكوميدية شديدة السخونة.
بداية لازم نتكلم على فكرة ان موضوع (الأب البيولوجي) والفرق بينها وبين الأب العايش مع الأم، الفكرة دي كلها غربية جداً ومش موجودة فى مجتمعنا العربي الشرقي، الامر اللى ممكن يسبب مشكلة للمشاهدين المتحفظين، لكن احنا لاحظنا ان الجميع مبسوط من سير الأحداث وقادر يتعامل معاها ذهنيا بشكل عادي، ومن هنا بنشوف اهمية السينما فى قدرتها على تصدير الأفكار للأخرين بدون اي مجهود، وازاي السينما العربية فاشلة فى تصدير اي قيم عربية او مصرية حقيقية، بعيدا عن عوالم الكباريهات وخناقات الحواري!
نرجع لفيلمنا.. الاخراج قائم على حشد اكبر قدر ممكن من مشاهد الكوميديا والمواقف الظريفة بشكل متتالى وسريع، بالتالى لا يوجد مكان للملل او الأحساس بعد اهمية مشاهدة الفيلم، لكن البعض ممكن يشعر ان الهدف الوحيد للفيلم هو الكوميديا المعتمدة على اسلوب واحد.. المشاهد المفاجئة والمفارقات الكوميدية، واللى بتكون اشبه ببرامج المشاهد الطريفة اللى بنشوفها فى التليفزيون.. لكن مين قال اننا بنزهق من المواقف دي؟! مين قال اننا مش بندور عليها على يوتيوب وفيس بوك؟! لكن فى راينا ان الفيلم كان محتاج بعض التنويع فى طبيعة الكوميديا اللى بيقدمها.
الموسيقي التصويرية والديكورات لعبت دورها المفروض منها فى النوعية دي من الأفلام، وتوارت علشان تعطي المجال كامل للكوميديا انها تسيطر على دفة الأحداث، والحقيقة ان نوعية المشاهدين اللى بتعجبهم الافلام دي، بتكون الموسيقي والديكورات اخر همهم.
Daddy’s Home فيلم كوميدي جميل تقدروا تبدأوا بيه السنة الجديدة.. كل سنة وانتم طيبين
