Daddy’s Home 2: مغامرة جديدة وكوميديا لا تنتهي

فترة طويلة فصلتنا عن مشاهدة فيلم كوميدي نخرج منه مع الجرعة دي كلها من الكوميديا والشعور فعلا بالسعادة والفرفشه. تعالوا نتعرف أكتر على الجزء الثاني من سلسلة أفلام Daddy’s Home

القصة

الفيلم بيستكمل أحداثه بعد الجزء الأول بفترة. العلاقة دلوقت بين براد وداستي أصبحت قوية. لكن عليهم مواجهة تحدي جديد هو أبائهم اللي انتقلوا للإقامة معاهم في موسم الإجازات، مفجرين مجموعة لا تنتهي من المواقف الكوميدية نتيجة تحكمهم ومحاولتهم السيطرة عليهم والتحكم في تصرفاتهم.

فريق العمل

الفيلم من تأليف و أخراج شين أندريز بالتعاون مع جون موريس في التأليف. أما بطولة الفيلم فكانت لميل جيبسون و مارك ويلبرج و ويل فاريل وجون سينا و ليندا كارديليني

الأداء التمثيلي

الأداء التمثيلي كان متميز جدا بسبب أن الأسماء المشاركة في الفيلم مش أسماء صغيرة ومش أول مرة يشتغلوا في المجال الكوميدي. كمان كان مميز جدا أن كل شخصية فاهمة المنطقة العمرية اللي بتأديها، وبالتالي المواقف الكوميدية اللي كانت بتخرج منهم كانت ممتازة وممتعة الى اقصى درجه.

السيناريو والحوار والأخراج

سيناريو الفيلم أعتمد على توزيع المشاهد والأيفيهات الكوميدية على مدار أحداث الفيلم بالكامل. بالتالي وجدنا نفسنا تقريبا بنضحك مع كل مشهد من مشاهد الفيلم. كمان التنويعة العمرية بين أبطال الفيلم من شباب وكبار وحتى أطفال تسببت في أن الجميع كان بيضحك، وكل واحد من المشاهدين كان بيضحك على الجزء الكوميدي المناسب لشخصيته.

والنجاح ده للفيلم أنه يضحك كل الفئات العمرية يعود أولا وأخيرا للإخراج الذكي والسيناريو المكتوب كويس جدا.

الديكورات والموسيقى والأزياء

ديكورات الفيلم نقلت لنا شعور أيام الأعياد والبرد، خاصة مع تصوير كتير من المشاهد في مناطق فيها ثلوج. أما الموسيقى التصويرية الخاصة بالفيلم فكانت ضعيفة ومش على المستوى اللي كنا متوقعينه، والحقيقة أننا كنا متوقعين مستوى أعلى من كده في الموسيقى.

الخلاصة

فيلم Daddy’s Home 2 فيلم كوميدي مميز ننصحكم بمشاهدته في الويك أند

علشان تبقى عارف:

تقييم الفيلم على موقع IMDB 6.2 من 10