Dark Phoenix: ختام ضعيف لسلسلة قوية
لما نتكلم عن ختام سلسلة أفلام The X-Men سلسلة الأفلام اللي عاشت معانا على مدار حوالي ١٨ سنة شوفنا فيها كتير من التطورات على صعيد القصة وعلى صعيد نفسية الأبطال. بنحس أننا كنا نستحق فيلم أحسن بكتير من Dark Phoenix
Dark Phoenix بيحكي عن جين جراي (صوفر ترنر) اللي بتستحوذ عليها قوة خارقة مختلفة وقوية جداً بشكل بيخليها تغير أتجاهاتها وانتمائها. الأمر اللي بيحط فريق X-Men قدام أختيار صعب بين فرد من الفريق وبين مصلحة البشرية بالكامل.
أقوى عنصر في الفيلم كان صوفي ترنر. في الحقيقة صوفي قررت تقدم أفضل أداء تمثيلي وجسدي عندها للفيلم، لكن القصة والسيناريو ما أعطوهاش الفرصة علشان تقدم الأداء الجيد اللي يليق بيها أو حتى يليق بسلسلة عريقة وقديمة زي دي.
الحوار في الفيلم كان ضعيف وسطحي ومافيهوش أي عمق. كمان حسينا بفجوات في السيناريو والخط الزمني للأحداث بين الأجزاء السابقة وبين الفيلم الحالي. وبشكل عام أسوأ ما كان في الفيلم هو أنه مجاوبش على أسئلة كان المفروض تكون أساسية في ختام سلسلة أفلام محتاجين نعرف فيها النقاط على الحروف. لكن على العكس ساب الفيلم نقاط كتير مفتوحة وخرجنا من الفيلم حاسين أننا مش فاهمين عالم X-Men كما يجب.
ومن الواضح أننا مش لوحدنا اللي حسينا بعدم الفهم. الفيلم حقق إيرادات قليلة جدا لحد دلوقت وبيلاقي هجوم كبير على مستوى الجمهور والنقاد على حد سواء. وفي رأينا الشخصي إحنا محتاجين نشوف إعادة إنتاج لنهاية سلسلة X-Men بشكل لائق أكتر.
لكن علشان نكون منصفين. الفيلم فيه قدر ممتاز من الخدع السينمائية ومجهود محترم في إخراج مشاهد الأكشن من المخرج سايمون كينبيرج اللي بيقدم أول تجاربه الإخراجية.
الموسيقى التصويرية كمان كان لها تأثير كبير علينا وساعدة على قوة الفيلم ومتابعتنا له. لكن القصة – اللي تعتبر واحدة من أهم عوامل أي فيلم- وضعفها وتفككها كانوا من أكتر الحاجات اللي ضايقتنا من Dark Phoenix
بنرشح Dark Phoenix للمشاهدة من محبي سلسلة X-Men ولو دي أول مرة تشوف السلسلة لازم تشوف الأجزاء السابقة – أو على الأقل أخر ٣ أجزاء – علشان تفهم ايه اللي بيحصل بالظبط.
