Dark Places : اماكن مظلمة.. فى النفس البشرية
بعد النجاح الكبير اللى حققه فيلم Gone Girl للمؤلفة جيليان فلين كنا متوقعين نفس النجاح بالنسبة لـDark places واللى كتبته نفس المؤلفة.. لكن الحقيقة ان خيبة الامل اصابتنا مع نهاية الفيلم.. لانه لم يكن بنفس القوة.. او حتي نصفها!
من اخراج جيل باكيه برينر وبطولة كلوي جريس موريتز و تشارليز ثيرون و كريستينا هندريكس و نيكوﻻس هولت بنشوف قصة بنت نجت من مذبحة قديمة تعرضت لها اسرتها بالكامل.. اخواتها وامها تم قتلهم ببشاعة على يد الاخ.. البنت او (تشارلز ثيرون) كانت الناجية الوحيدة والشاهدة الوحيدة فى القضية، وبالنسبة لقصة جريمة بشعة تمت فى مدينة ريفية امريكية بتتحول القصة بالكامل لاسطورة وبتكتسب البنت شهرة غير عادية بتشجعها على تاليف بعض الكتب والاكتفاء بالعيش على عوائد بيع الكتب وتبرعات المتعاطفين!
مع تطور الاحداث بنعرف ان تشارلز بتتلقي عرض من احد الجمعيات المهتمة بالنبش وراء جرائم القتل القديمة الغامضة، ولان الفلوس معاها قربت تخلص، بتضطر تتعامل معاهم على مضض وعلى فرضية ان اخوها القاتل برىء وان القاتل الحقيقي لسه خارج القضبان.. الكلام ده بالنسبة للشاهدة الاساسية فى القضية كان مجرد اي كلام مضطرة للتعامل معه فقط علشان الفلوس.. لكن احداث الفيلم بتثبت العكس.
على الرغم من ان كلامنا عن الفيلم بيعكس حالة من التشويق والاثارة الا ان الحقيقة على العكس من ذلك، الفيلم عاني من الترهل فى الاحداث والاعتماد على الصدف فى السيناريو، ومع وجود عدد كبير ومتشابك من الاسماء والاماكن والشخصيات واتباع اسلوب الحكي فى اكثر من زمن بحيث بنشوف جزء من الاحداث فى الماضى وجزء من الاحداث فى الوقت الحالي، كل الامور دي جعلت الفيلم (مكلكع) ازيد من الازم وبدون اي استفادة حقيقية من كل التعقيدات دي اكتر من استعراض عضلات القصة والسيناريو.
الحوار كان قوي ومؤثر، خاصة مع بعض الجمل الاعتراضية الساخرة الاذعة القصيرة اللى كانت بتتقال من حين لاخر، وتشارلز ثيرون قدرت تثبت نفسها كممثله قادرة تسيطر على انفعالات وجهها وقدراتها التمثيلية طوال الوقت، ولو كانت لاقت مساعدة من باقى الابطال على صعيد التمثيل او الديكور او الموسيقي.. كان ممكن الفيلم يكون له وضع افضل من وضعه الحالي.
طبعا مش هانحرق عليكم نهاية الفيلم، لكنها للاسف جائت غير مقنعه وسريعه ومبتذلة، ومعتمدة بشكل كبير على الصدف والاستنتاجات اللى بنكتشفها فى اللحظات الاخيرة، كل الامور دي بتجعل الفيلم لا يقارن بالنسبه لنا بفيلم زي Gone Girl واللى قدم حبكة بوليسية مختلفة ومتميزة واكثر ثراء وامتاعا.
ادخلوا Dark Places لو عاوزين تضيعوا شويه وقت مع فيلم مسلي.. او استنوه مع العرض فى الفضائيات.
