Dark Waters : ممكن تضحي بإيه علشان تدافع عن.. البيئة؟!
أحيانا قضايا زي البيئة وتلوثها والمشاكل اللي ممكن تحصل للبشر من وراها مش بتحصل على اهتمامنا بشكل كبير. على الرغم من أن المشاكل دي بتأثر على حياتنا حتى لو على المدى الطويل زي مشكلة التغير المناخي واللي بنلاحظ تأثيرها على الجو عندنا في الفترة الأخيرة.
في Dark Waters بنشوف كفاح محامي في رفع قضية على شركة ضخمة بيتهمها فيها بتلويث البيئة والتسبب في مشكلات ضخمة – مش عاوزين نحرقها عليكم – وبنشوف إزاي ممكن الشركات دي تحاول تخلي أي شخص يقف في وجهها يدفع الثمن غالي.
من أجمل الأمور اللي لاحظناها في الفيلم كانت الأداء التمثيلي من مارك روفالو و آن هاثاواي و تيم روبنز و بيل كامب واللي قدموا كلهم حالة من التناغم اللي ظهرت بوضوح على الشاشة. واللي تستحق كل التقدير والاحترام لموهبتهم واحترافيتهم العالية.
الجميل كمان في الفيلم أننا مش هانشوف شرير واضح في الأحداث. لكن هانشوف إزاي الشرير ممكن مايكونش شخص بقدر ما يكون (كيان).. والكيان ده لو كان شركة كاملة. ايه أبعد مدى ممكن توصل له خاصة في دولة المفروض أنها بتحترم القانون وبتطبقه بصرامة؟
مع نهاية الفيلم هاتشعر أن المشاكل البيئية تأثيرها ممكن يكون أكبر من شوية الكلام المحفوظ عن (ثقب الأوزون) وخلافه. ونعتقد أن هو ده الهدف الأساسي من المخرج تود هاينز والمؤلف ماثيو مايكل كارنهان
مع اقتراب موسم الأوسكار ومحاولة صناع الأفلام تقديم أعمال مقتبسة عن قصة حقيقية لمحاولة الفوز بجائزة في الأوسكار. هل Dark Waters هايكون له نصيب؟ ده اللي هانعرفه خلال الشهور القادمة.
