Darkest Hour: كيف يتخذ أعظم السياسيين قراراتهم؟

تحدي كبير كان قدام صناع فيلم Darkest Hour لأنهم بيناقشوا فترة تاريخية تعتبر محفوظة بالنسبة لمحبي القراءة ومشاهدة الأفلام التاريخية،  ولما تكون الأحداث محروقة بحكم التاريخ، يتبقى ايه أمام المخرج والأبطال علشان يقدموا لنا من خلاله تجربة غنية وممتعة؟ هو ده التحدي الأكبر امام صناع فيلم Darkest Hour واللي هانعرف ازاي تغلبوا عليها.

القصة

الفيلم بيحكي عن فترة حاسمة في تاريخ الحرب العالمية الثانية اللي خاضتها بريطانيا ضد المانيا واليابان وروسيا في فترة الاربعينات. والفيلم بيناقش تحديدا قرار الحرب أو السلام اللي كان على رئيس وزراء بريطانيا ونستون تشيرشل انه ياخده مع بداية شهور الحرب. القرار اللي يعتبر واحد من أهم القرارات السياسية في العالم حتى اليوم.

فريق العمل

الفيلم من اخراج  جو رايت ومن تأليف  أنطوني مكارتن ومن بطولة  رونالد بيك أب و ليلي جيمس و جاري أولدمان و بين مينديلسون و كريستين سكوت توماس

الأداء التمثيلي

من وجهة نظرنا المتواضعة أحنا شوفنا أعظم أداء تمثيلي خلال العام من خلال الدور اللي قام به جاري اولدمان في دور ونستون تشرشل. والحقيقة أنه قدر ينقل لنا شعور الحيرة والشعور بأن مستقبل دولة كاملة ملقى على عاتق راجل واحد لازم ياخد قرار بشن الحرب أو الأستسلام للقوات النازية.

كمان لا يمكن ننسى الأداء التمثيلي المميز من كريستين سكوت توماس في دور كليمنتين تشرشل واللي قدرت تجسد دور الزوجة  القادرة على الوقوف خلف زوجها ودفعه للأمام، أو حتى سحبه للخلف –للأمان- علشان يقدر في النهاية ياخد القرار المناسب والصحيح في ظروف عصيبة

السيناريو والحوار والأخراج

سيناريو الفيلم كان قوي ومكثف ومحتاج تركيز في كل مشهد وجملة حوارية، كمان الأخراج قدر يعبر بالفيلم من نقطة صعبة وهي تقديم أحداث تاريخية معروفة للجميع لكن من وجهة نظر جديدة وشيقة أجبرتنا كمشاهدين على المتابعة من البداية للنهاية، أما الحوار فكان مميز وعلى الرغم من جديه الفيلم لكن الحوار قدر يكسر الجدية دي ببعض الهزل والتعليقات الطريفة.

الديكورات والموسيقى والأزياء

ديكورات الفيلم كانت مميزة جدا ونقلتنا زمنيا لفترة الحرب العالمية الثانية، كمان الموسيقى التصويرية والأزياء اللي تم اختيارها بعناية كلها لعبت دور مهم علشان ننتقل في الزمان والمكان لفترة صعبة من فترات الصراع الأنساني.

الخلاصة

فيلم Darkest Hour واحد من أفضل أفلام العام ونعتقد أنه هايكون منافس قوي وأساسي علي جائزة الأوسكار

علشان تبقى عارف:

الفيلم يعتبر واحد من أهم الأفلام التي ستنافس على جائزة الأوسكار هذا العام