Dead Awake: الرعب من شلل النوم

ناس كتير بتعاني من اختلال في النوم أسمه شلل النوم. والأنسان بيشعر خلاله أنه صاحي لكن مش قادر يحرك جسمه أو يتنفس بشكل صحيح كأن حد قاعد على صدره! وزمان كانوا بيسموا الظاهرة دي (الجاثوم) وكانوا بيقولوا أن السبب فيها هو الجن. ولحد اليوم بتمثل الظاهرة دي مصدر ممتاز لكتاب الرعب، وهو ده اللي بيحكي عنه فيلم Dead Awake

القصة

Dead Awake بيحكي عن سيدة شابة بتحقق في مجموعة من الجرائم المرتبطة بناس بتشوف في أحلامها أنهم بيموتوا قبل موتهم على أرض الواقع، وبتبدأ تربط بين ظاهرة الشلل أثناء النوم وبين حالات الوفاة، الأمر اللي بيفجر سلسلة لا تنتهي من المشاهد المقلقة والمرعبة والمفاجئة.

فريق العمل

الفيلم من أخراج فيليب جوزمان وتأليف جيفري ريديك وبطولة جيفري ريديك و جوسيلان دوناهو و جيسي برادفورد و بريا جرانت و بيلي بلير

الأداء التمثيلي

على الرغم من أن كل المطلوب من أبطال الفيلم كان افتعال الشعور بالرعب وإقناع المشاهدين بيه، ثم فريق المؤثرات الخاصة هايقوم بالباقي، لكن الأداء التمثيلي كان واحد من أهم نقاط الضعف في الفيلم، وحسينا أن حتى الدور الصغير المطلوب من الابطال ماقدروش يقوموا بيه على أكمل وجه. وأن الأداء التمثيلي لو كان أفضل الفيلم كان هايبقى في منطقة تانيه خالص.

السيناريو والحوار والأخراج

سيناريو الفيلم كان واضح وبيعتمد على تتبع الأحداث من بدايتها لنهايتها بدون الأعتماد على الفلاش باك أو مشاهد الماضي الا في اضيق حدود ممكنة علشان يوفر تجربة مشاهدة سلسلة للمشاهدين والحقيقة ان السيناريو نجح في ده، وتضافر معاه الأخراج علشان يقدموا لنا في النهاية تجربة مشاهدة سلسلة ومرعبة في نفس الوقت.

الديكورات والموسيقى والأزياء

الديكورات والموسيقى والمؤثرات الخاصة كان واقع عليها العبء الأكبر علشان يقدموا لنا في النهاية تجربة مرعبة وحقيقية. لكن مع الربع الأخير من الأحداث حسينا أن المؤثرات زادت عن الحد شويه، لكن في النهاية مستوى المؤثرات الخاصة كان ممتاز وقدر يرعبنا فعلا في اكتر من مشهد.

الخلاصة

الناس اللي بتخاف تنام لوحدها أو بتخاف من الكوابيس أثناء النوم هاتحس أن Dead Awake هو أكتر فيلم مرعب في التاريخ!

علشان تبقى عارف: حقق الفيلم حتى الأن إيرادات قدر بحوالي 278 ألف جنيه