Deadpool2 : جزء جديد من كوميديا الابطال الخارقة
عالم الأبطال الخارقين أصبح مادة خصبة لصنع عشرات الأفلام كل سنة. سواء في السلاسل الخاصة بكل واحد من الأبطال على حدة، أو حتى في الأفلام اللي بتجمع ظهور عدد من الأبطال الخارقة مع بعض.
ومع الانتشار المكثف للأفلام دي كان لازم تظهر سلسلة أفلام تتريق وتقلد الأفلام دي. لكن بشكل أذكى وأحسن من سلاسل الأفلام الساخرة اللي اعتدنا مشاهدتها في الفترة الأخيرة. وسلسلة Deadpool بتعتمد بشكل أساسي على النقطة دي.
في الجزء الأول بنبدأ نتعرف على أبعاد البطل الخارق اللي بيكتسب قدرته الخارقة وقدراته العالية في القتال واحتمال التعرض لاطلاق النار أو حتى الحرق. بعدما كان مصاب بالسرطان، وازاي بيقدر يقاتل مجموعة من الأشرار وفي نفس الوقت يحتفظ بحسه الفكاهي واللي بيساعده عليه كافة العوامل في الفيلم زي السيناريو والحوار والتكتيك الاخراجي نفسه.
من الأمور المهمة اللي بيلعب عليها ريت ريز و بول ويزنيك كتاب الفيلم، هو فكرة اختراق الحائط الرابع والتحدث مع الجمهور بشكل مباشر. الأمر اللي حقق نجاح كبير في الجزء الأول وتم استخدامه بكثافة مفرطة في الجزء الثاني لدرجة انه أحيانا كان غير كوميدي.
المخرج ديفيد ليتش كان عارف انه بيقدم جزء ثاني من سلسلة كان الجزء الأول منها قوي، بالتالي كان لازم يقدم جزء ثاني أقوى وأكثر تميزا، واختار ليتش أنه يقدم المزيد من كل حاجه عجبك المشاهدين في الجزء الأول، مع محاولة الحد من مشاهد الدم والقتل في الجزء الماضي، ونجح الأمر لكن بعض المشاهد كانت تتصف بالدموية المفرطة.
رايان رينولدز قدم أداء رائع ومميز كعادته. أداء ساخر من أي وكل شيء وخاصة من أفلام الأبطال الخارقة، ساعد في تقوية أداؤه وتقوية تقييمنا للفيلم بشكل عام تصميم التترات بشكل مميز على غرار أفلام جيمس بوند لكن مع مزيد من السخرية من عالم هوليود بشكل عام.
زازي بيتز في دور دومينو صاحبة القوى الخارقة المحظوظة كان من الأدوار المهمة اللي لفتت انتباهنا، وطبعا لا يمكن ننسى دور جوش برولين كشرير الفيلم اللي بيتحول لصديق البطل بعد كده بتسلسل درامي مميز وجميل.
فيلم Deadpool2 يعتبر جزء ثاني جيد. مش بنفس قوة الجزء الأول لكنه فيلم جيد ويستحق المشاهدة، خاصة أنه بيأصل لمحاولة تقديم فريق أبطال خارقين تحت أسم X Force. ايه توقعاتكم للفريق ده؟
علشان تبقى عارف: على الرغم من أن النجم مايكل شانون كان عاوز يقوم بدور كايل، لكن مواعيد الأنتاج والتصوير كانت عكس رغبته وذهب الدور في النهاية الى جوش برولين.
