Destroyer : نيكول كيدمان بتلعب دور عمرها!
فنانة الإغراء الشهيرة مارلين مونرو، وجه لها مجموعة من الصحفيين زمان إتهامات أنها بتنجح بجمالها فقط، وهدومها الفخمة وصرفها المبالغ فيه على شكلها ومكياجها. مارلين ردت عليهم بإنها أتصورت وهي لابسه (شوال خيش). والصورة كسرت الدنيا لحد النهرده!
وعلى الرغم من أنها واحدة من أشهر وأجمل نجمات هوليود. لكن نيكول كيدمان قررت تتخلى عن جمالها في أحدث أفلامها. بنعتقد أنها كانت بتراهن نفسها أنها تقدر تنجح زي ما مارلين مونرو عملتها في يوم من الأيام.
في فيلم Destroyer بنشوف (ايرين بيل) – بتقوم بدورها نيكول كيدمان – واللي بتشتغل ضابطة شرطة. وفي شبابها بتحاول تخترق عصابة شهيرة وتتجسس عليهم كجزء من شغلها. بعد كده ومع تقدمها في العمر بنشوفها مرهقة ومتعبة و (مدمرة) زي عنوان الفيلم. علشان نبدأ نعيش معاها رحلتها وازاي حصل لها كل التحول ده.
أهم وأقوى عوامل الفيلم هي المكياج المميز واللي حول نيكول كيدمان لواحده متعبة ومدمرة نفسيا. المميز في المكياج هو أنه مش مبالغ فيه. وملعوب باحترافية عالية جدا علشان يأدي الغرض منه بالظبط بدون زيادة أو نقصان.
أداء نيكول كيدمان التمثيلي ممتاز جدا. ولسه نيكول قادرة تأكد على قدرتها التمثيلية العالية. وأن المكياج بس مايصنعش ممثلة لوحده بدون موهبة ودراسة.
لكن في رأينا الضعيف في الفيلم هي القصة القابلة للإستنتاج، واللي مافيهاش أي مفاجأة للمشاهدين حتى محاولات المخرجة كارين كوساما لعمل بعض التشويق في الفيلم أدت لتطويل بعض المشاهد وزيادة نسبة الترقب عندنا كمشاهدين. لكن في النهاية بتخرج المشاهد دي بدون أي مفاجأة. وده ممكن يخلي المشاهد يشعر بالملل.
لكن من ناحية تانيه الدراما في الفيلم مكثفة، والفيلم بيعتمد على عدد قليل نسبيا من الممثلين الأساسيين علشان يوصل لنا في النهاية قصة مترابطة وقوية.
Destroyer فيلم مميز ومتعوب عليه. وننصح المشاهدين بمشاهدته خاصة من جمهور نيكول كيدمان اللي عاوزين يشوفوها بشكل مختلف تماما عن باقي أدوارها.
