Dilwale : حسابات بوليود مش دايما صح!
بوليود.. وأه من بوليود واللى بتعمله فى المشاهدين!
الحقيقة ان سينما بوليود (السينما الهندية) قدرت تكون جمهور واسع جدا فى المنطقة العربية بشكل عام وفى مصر بشكل خاص، جمهور بيسترجع حالة من الـ(نوستالجيا) مع كل فيلم هندي جديد بيتم عرضه فى السوق السينمائى، وشباب بيفتكروا افلام (اميتاب باتشان) القديمة اللى كنا بنتجمع حواليها فى المناسبات العائلية لما كنا اطفال.. الحقيقة ان الأطفال دي كبرت.. والمناسبات العائلية اصبحت مجرد تجمعات للشباب حوالين الراوتر وبين شبكات الواي فاي… الشىء الوحيد اللى لم يتغير… هو النمط الهندي فى الأفلام!
من أخراج روهيت شيتي وبطولة (شاروخان) و (كاجوال) و (بومان ايراني) بيبدأ الفيلم اللى شاهدناه فى احدي سينمات وسط البلد اللى كانت شبه ممتلئة عن اخرها بالمتابعين المتحمسين. الفيلم بيبدأ بمشاهد أفتتاحية لشاروخان اللى بيبذل كل عزيز وغالى عنده لحماية شقيقة من أي مكروه.. ثم بيسحبنا الفيلم لـ(فلاش باك) طويل جدا بيسترجع فيه (شاروخان) ذكري قصة حب جمعته بابنة زعيم عصابه كبير.. واللى على الرغم من المشاكل الغريبة والعقبات اللى بيلعب القدر فيها دور البطولة، بيحاول ابطالها انهم يجتمعوا من جديد ويهزموا بحبهم المستحيل!
المستحيل طبعا كلمة لا تعرفها السينما الهندية.. بالتالى لما نشوف عربية بتتشقلب خمس مرات ولا يصاب اللى فيها بخدش.. او خمس رجال بياخدوا علقة سخنة من شخص واحد فقط.. او حتي كرنفال احتفالى كامل فى الشارع تزامنا مع قصة حب.. كل دي امور عادية جدا مقارنة بأمور أكثر عجائبية شوفناها فى افلام بوليود، بل على العكس احنا ممكن نتهم فيلم اليوم بعدم اتساع الافق بالشكل اللى يتناسب مع باقى الافلام الهندية اللى شوفناها قبل كده!
الفيلم –كعادة بوليود- بيحاول يجمع كل شىء فى خليط واحد.. قصة حب رومانسية.. اكشن وصراعات ومطاردات بالسيارات.. تراجيديا وقلوب جريحة وخيانة مع شوية استعراضات ورقصات متميزه! لكن الحقيقة وللأسف الشديد فى رأينا أن الفيلم فشل فى عمل الخلطة (البوليودية) اياها وقدم كل شىء فى اطار من الاستهتار والأستعجال على الأحداث بشكل لم يرضينا اطلاقا!
على سبيل المثال اخراج مشاهد الأكشن تم باستسهال كبير رغم التكلفة الواضحة، ومشاهد الاشتباك فى اول الفيلم شوفناها كأن الكادرات بيتم زيادة سرعتها بإسلوب حاول يكون كوميدي لكنه حتي فشل فى اثاره الضحك فى النقطة دي.
نقطة التميز فى الفيلم تمثلت فى الموسيقي التصويرية الجميلة، واللى تم توظيف جملها الموسيقية الأساسية بحيث تتلائم مع كل الأحداث على اختلافها فى الفيلم وتنوعها مابين الرومانسية والدراما..الخ.
الأداء التمثيلي كان هو الأداء التمثيلي المفوم لدينا عن بوليود، وطبعا من الصعب مقارنة اداء شاروخان هنا بفيلم زي My name is khanوالا نكون بنظلم الفيلمين!
Dilwale فيلم هايعجب المجانين بشاروخان.. وهايعجبك محبى بوليود على اختلاف افلامها وثقافتها.
