Dino Time: يا أفكارك يا هوليود!
الفكرة البسيطة الممتعة والتنفيذ الهادىء المحترف فى آن واحد هو ده كان شعار المخرجين جون كافكا ويون سوك تشو أثناء تنفيذ فيلم Dino Time، الروح دى فى الإخراج انعكست على كل فريق العمل روب شيندر، جين لينش، يورى لوينتال وغيرهم كثير.
الفيلم بـ يحكى عن 3 أطفال بـ يعملوا رحلة غريبة وممتعة عبر الزمن، للعودة 65 مليون سنة للخلف! ثم بـ يقعوا أسرى لأحد الديناصورات العايشة فى فترة ما قبل التاريخ ثم بـ تتوالى بهم الأحداث المثيرة بعد كده واللى مش عاوزين نحرقها عليكم.
الرسومات كانت متميزة، واللى ميزها فى الفيلم ده بساطتها مع التركيز على أبسط التفاصيل فى نفس الوقت، مع اهتمام خاص بإبراز الألوان البراقة والمشرقة طوال الوقت بشكل حول تجربة المشاهدة للفيلم لكرنفال ألوان جميل ومتميز طوال الوقت.
الموسيقى التصويرية المرحة لعبت دور مهم فى أحداث الفيلم، وحافظت على مستوى البهجة طوال الوقت، وكان لها ظهور مهم ومؤثر فى أحداث الفيلم الممتعة على طول الخط، هكذا تعامل هوليود أطفالها، ده أفضل بكثير من الأفلام العربية اللى شوفناها مؤخرًا اللى بـ يتم استعمال الأطفال فيها أسوأ استخدام سواء للظهور خلف راقصات شبه عاريات أو لاستعمال خفة دمهم الرهيبة فى عمل إيفيهات تملأ بها وقت الفيلم بأى شكل!
فيلم Deno Time خفيف ومناسب للأطفال من كل الأعمار، وبـ يقدم المعلومة والفكاهة بأسلوب سلس وممتع، ننصحكم –أنتم وأطفالكم– بمشاهدته.
