Dirty Grandpa : فيلم ماينفعش معاه انصاف الحلول!
مشكلتنا الوحيدة مع الفيلم كانت اننا تقريباً ماشوفناش الفيلم! الرقابة المصرية تكفلت بقطع معظم مشاهد الفيلم، ولم يتبقى لنا الا خيط واهي من الأحداث مربوط ببعضه بشكل ضعيف جدا.. برضو احنا مش حابين نستعجل فى الهجوم على الرقابة لأننا ماشوفناش النسخة الكاملة من الفيلم، واللى نعتقد ان الاقبال عليها هايكون قوي جداً من المصريين بالذات علشان بس نفهم الأحداث!
من اخراج دان ميزر وبطولة روبرت دي نيرو و زاك افرون بنشوف قصة شاب له طباع مختلفة شويه عن باقى الشباب، بينطلق فى رحله مع جده اللى بيقدر يخدعه ويخليه يشاركه فى رحلة مجنونة.. الرحلة اللى بتاخد الابطال وبتاخدنا فى عالم مجنون من الكوميديا والضحك المتواصل على مدار حوالى ساعتين هم مدة عرض الفيلم.
الحقيقة ان قصة الفيلم مش جديدة على الإطلاق، لكن الجديد هو اسلوب التمثيل ومستوي الكوميديا اللى كان صارخ، لكن للاسف كانت معظم المواقف الكوميدية فى الفيلم معتمدة على ايفيات او تلميحات –واحيانا تصريحات- ليها طابع جنسى بحت، الامر اللى خلانا نحس اننا بنسمع نكته قبيحة على سبيل المثال.. لا احنا قادرين نمنع نفسنا من الضحك وفى نفس الوقت مش قادرين نرشح الفيلم لكل الاعمار.
روبرت دي نيرو عامل زي ازازة النبيذ القديمة.. كل ما يتقدم فى السن كل ما يزيد خبره وقدرة على تادية اى شخصية تطلب منه.. بداية من الادوار الجاده وانتهاء بالكوميديا وده ان دل على شىء يدل على اننا امام شيطان تمثيل حقيقي وانه قادر على اقناعنا باي دور يقوم به.
زاك افرون وعلى الرغم من تالقه هو كمان فى الاداء التمثيلي، الا ان الحقيقه روبرت دي نيرو كان واكل الجو منه تماما، وكنا بننتظر ظهوره على الشاشه بفارغ الصبر علشان يزود جرعة الكوميديا اكتر واكتر بالنسبه لنا.
زى ما قولنا فيلم dirty grandpa بالنسبه لنا مش فيلم كامل لحد ما نقدر نشوف النسخة النهائية.. واللى نعتقد ان معظم الفضائيات العربيه ها ترفض تعرضها كامله.. لكن اللى شوفناه من الفيلم كفيل انه يخلينا نقول انه واحد من افضل الافلام الكوميدية خلال السنة.. وان كانت القصة مكررة بعض الشىء.
