Divergent: نظرة خيالية للمستقبل
بعد النجاح الكبير اللى حققته سلسلة أفلام The Hunger Games (ألعاب الجوع)، والمقتبسة عن سلسلة من الروايات بـ تحمل نفس الاسم، نعتقد أن لعاب المنتجين فى هوليوود سال لإنتاج نوعية أعمال مشابهة، وكمان مقتبسة عن روايات حققت نجاح كبير.
أحداث الفيلم بـ تدور فى المستقبل، وفى مدينة شيكاجو، حيث يتم تصنيف الناس وفقًا لشخصياتهم لفئات رئيسية: فئة المثقفين وفئة الشجعان وفئة الأشخاص اللى عندهم إحساس عالى بالتضحية بالذات، وغيرها، بطلة الفيلم تريس اللى قامت بدورها شايلين ودلي عندها صفات مشتركة بين كل الصفات دى، وده بـ يخليها من فئة بـ يتم تصنيفها على أنها ضد الأمن، الأمر اللى بـ يترتب عليه عدد كبير من الأحداث اللى مش عاوزين نحرقها عليكم ونسيبكم لمتابعة الفيلم.
على الرغم من التشابه الكبير بين أحداث الفيلم وأحداث سلسلة أفلام “ألعاب الجوع” اللى أخرج أحدث أجزائها فرانسيس لورانس وقامت ببطولتها جنيفر لورانس فى دور كاتنيس أيفردين الشهيرة، إلا أننا فى اعتقادنا الشخصى أن ألعاب الجوع كان أفضل من فيلم اليوم، وزى ما قولنا كنا طوال الوقت عندنا شعور أن الفيلم هو استغلال لنجاح نوعية الأفلام اللى بـ تتكلم عن المستقبل واللى بـ تستمد أحداثها من روايات.
المؤثرات الخاصة والديكورات الحديثة وأيضًا الموسيقى التصويرية كان لها أثر ضخم فى دخول المشاهدين فى أحداث الفيلم، ونقدر نقول أن دورهم كان لا يقل عن دور أى عامل أساسى فى عوامل نجاح أى فيلم ويمكن كان عندنا شعور أن الموسيقى التصويرية كان ممكن تكون أفضل من كده، على عكس إخراج مشاهد الأكشن ومشاهد القفز من المبانى العالية اللى كانت متميزة، إلا أننا فى بعض الأحيان كان بـ يتسرب عندنا شعور بزيف بعض الأحداث أو عدم ملائمتها للمنطق، لكن بطبيعة الحال إحنا عارفين أن أفلام الخيال العلمى والأفلام اللى بـ تتكلم عن أحداث مستقبلية بـ تحتاج كثير من “تكبير الدماغ”.
نعتقد أنه هـ يكون هناك أجزاء ثانية بـ نستكمل فيها أحداث فيلم Divergent أو بـ نشوف لها إعادة تقييم وإنتاج، نعتقد أن ساعتها ممكن نصدر على السلسلة أحكام أكثر قوة لما تكتمل وجهة نظر القائمين على الفيلم، وعلى كل حال بـ نعتقد أن الفترة القادمة هـ تشهد صدور عدد كبير من أفلام الخيال العلمى، نتمنى أنها تكون أقوى وأفضل.
