Doctor Sleep : الفيلم مش هايخليك تنام!

شعور عام بعدم الراحة لفيلم Doctor Sleep كان هو المسيطر علينا. لأن الفيلم يعتبر استكمال لأحداث فيلم The Shining اللي يعتبر من أنجح وأقوى أفلام الرعب اللي شوفناها في حياتنا.

ومؤخرا شوفنا تجارب كتير في هوليود لاعادة اصدار أفلام قديمة بشكل جديد. والنتائج كانت كارثية في بعض الأفلام وضعيفة جدا في أفلام تانيه. بالتالي كان عندنا شعور عام أن هايكون فيلم ضعيف وغير مؤثر.

لكن اللي شوفناه أن Doctor Sleep قدر يحقق نجاح كبير قوي مع سيناريو مختلف وإخراج عظيم قدر يبني على The shining بدون ما “يسرق” منه وده في حد ذاته انجاز كبير وسط الضعف العام في انتاجات هوليود، وأفلام الرعب بشكل خاص.

Doctor Sleep بيستكمل حياة الطفل الصغير الناجي من فيلم The shining بعد ما أصبح شخص بالغ كبير. وازاي بيسعى أنه يحمي بنت صغيرة من محاولة منظمة مجهولة قتل الأطفال اللي عندهم قدرات خارقة للطبيعة.

مخرج الفيلم مايك فلاناجان يعتبر صاحب السبب الأول في نجاح الفيلم. بسبب المجهود الخطير اللي قام بيه علشان نشوف الأحداث في النهاية مرعبة لكن بدون اللجوء للرعب السهل المعتمد على المفاجأة وخروج أشباح  وكائنات خرافية من جوانب الشاشة علشان ترعب المشاهدين. لكن الرعب في Doctor Sleep كان رعب نفسي بالمقام الأول. وده مش غريب على مخرج قدم لنا قبل كده أعمال زي The Haunting of Hill و Hush و Gerald’s Game وغيرها.

الأداء التمثيلي لكل ابطال الفيلم كمان كان مميز جدا. لكن نخص بالذكر ريبيكا فيرجسون اللي قدرت تقدم دور معقد وفيه تناقضات كبيرة. كل ده عملته بطريقة سهلة لدرجة عبقرية.

مانقدرش نتكلم عن Doctor Sleep بدون ما نتكلم عن الديكورات المميزة واللي خليتنا نشعر بالنوستالجيا وتذكر أحداث The Shining بعد اقتباس بعض خلفيات الفيلم وموسيقته التصويرية اللي كانت بتظهر من وقت للتاني في خلفية الأحداث علشان تقول لنا (أفتكروني) كل ده بدون ما نشعر أن الفيلم مقتبس أو بيعيد تقديم مشاهد من The Shining

Doctor Sleep فيلم رعب غير تقليدي مع أداء وإخراج غير تقليدي. في زمن أصبح أسهل حاجه ممكن تحصل هي تقديم فيلم رعب تقليدي! لكن ننصحكم بمشاهدة فيلم The Shining علشان تقدروا تفهموا وتعيشوا تفاصيل الفيلم بشكل كويس.