Doctor Strange : بداية موفقة لسلسة ناجحة
الـSuper Heros وما أدراك ما الـSuper Heros… الدجاجة اللى بتبيض بيضة دهب لمنتجي الأفلام فى هوليود، وطاقة القدر اللى اتفتحت لكل العاملين فى مجال السينما، وضمنت لهم القدرة على إنتاج أفلام متواصلة بتلقى قبول النقاد والجمهور على حد سواء.
ولما نتكلم عن الأبطال الخارقين لازم نتكلم عن (مارفل).. عملاق إنتاج الأفلام الهوليودية عالية التكلفة والدقة، وقواد دفة أعمال الأبطال الخارقين فى العالم السينمائى.. ومنتجين فيلم اليوم اللى هانتكلم عنه بالتفصيل دلوقت.
Doctor Strange من تأليف جون سباهتس اقتباساً عن رواية ستيف ديتكو المصورة، واللى وضع لها السيناريو والحوار سى روبرت كارجيل و سكوت دريكسون، وبيحكي عن حادث بيتعرض له الدكتور المتميز ستيفن سترينج واللى بيجعله غير قادر على ممارسة الطب، ومن هنا بيبدأ رحلة طويلة للبحث عن العلاج المناسب لحالته، الأمر اللى بيفتح أمامه طاقة نور جديدة من خلال تعرفه على مجموعة من البشر بتاخد السحر منهج لحياتهم علشان يحموا الأرض من غزو كائنات غريبة ومرعبة!
كعادة أفلام مارفل، الإنتاج الضخم كان بيلعب دور مهم فى نجاح الفيلم، كمان المؤثرات الخاصة والخدع والمؤثرات البصرية كان لها نصيب الأسد كعامل قوة من عوامل نجاح الفيلم، والحقيقة العامل ده كان مبهر جداً بالنسبة لنا وحسينا إن كان له نصيب مهم من نجاح الفيلم، لكن بدون قوة الأداء التمثيلي أو السيناريو كان هايكون مجرد فيلم مبهر بصرياً وخلاص.
الأداء التمثيلي لـ بينيديكت كامبرباتش كان متميز جدا، وكان مقنع خاصة فى مشاهد القتال والأكشن على الرغم من قلة مشاركته فى النوعية دي من الأفلام، والحقيقة إن كامبرباتش واحد من أفضل نجوم هوليود ولا يمكن ننسى مشاركته فى الفيلم المتميز The Imitation Game وغيرها من الأفلام.
على الرغم من قوة القصة والسيناريو وعظمة المؤثرات الخاصة والتمثيل، إلا إن حوار الفيلم كان واقع بشكل كبير، وتم وضع كتير من الجمل المستقطعة للسخرية داخل الفيلم، وحسينا إنها مقحمة على الأحداث ومش فى محلها ومش مضحكة بالأساس، لكن زي ما أحنا عارفين السوبر هيرو فى أفلام مارفل لازم يكون عنده حس دعابة قوي!
على الرغم من قوة الموسيقي التصويرية إلا أنها زي الحوار، كانت مش مناسبة ومش متماشية مع الروح العامة للفيلم، على الرغم من تميز الموسيقي فى المشاهد النهائية للأحداث وقدرتها على التماشي مع مشاهد الصراعات فى الفيلم.
Doctor Strange فى مجمله فيلم متميز، وبننصح بمشاهدته علشان أكيد هايكون له أجزاء ثانية أكثر متعة وإثارة.
