Don’t Breathe : بجد مش هاتعرف تتنفس!
ياتري هايكون إيه إحساسك لو قولنا لك إن عصابة متخصصة فى السرقة واقتحام المنازل قررت تسطو على رجل أعزل أعمى متقدم فى السن وهو مقيم فى منزله لوحده؟ النتيجة محسومة وأكيد هاتشعر بالشفقة على الرجل العجوز اللى هايواجه أسوأ كوابيسه… اللى شوفناه فى الفيلم كان العكس تماما!
من إخراج فيدي الفاريز وبطولة سيرجيج أونوبكو و جاين ماين جرافيس و دانيل زوفاتو بنشوف قصة مجموعة من المراهقين بيقرروا سرقة منزل بيسكنه رجل أعمي وحيد.. الأحداث بتتطور لما بتكتشف المجموعة إن الرجل مش بالمسكنة اللى يبدو عليها، وإنه على الرغم من إنه أعمي إلا إنه قادر على ايقافهم عند حدهم.. مش كده وبس.. هو قادر على تحويلهم من مجرمين لمعدومي الحيلة بيدوروا على أي طريقة للهرب!
نقدر بسهولة نصنف الفيلم كفيلم رعب نفسي بيلعب على فكرة الـ Plot Twist أو المفجأة اللى بتقلب الأحداث رأساً على عقب، على الرغم من تركيز الجزء الأخير من الفيلم على ما يسمي الرعب المعوي أو الرعب القائم بالمقام الأول على المشاهد المقززة والمخيفة.
الأداء التمثيلي للأبطال كان فى قمة الروعة، ويكفي إننا نعرف إن سيرجيج أونوبكو كان بيلبس عدسات معتمة علشان مايشوفش حاجه أثناء التصوير بحيث يقدر يعيش الجو الحقيقي للأحداث، أما باقي الممثلين فكان أداؤهم متميز وكتم أنفاسنا فعلاً أثناء المشاهدة.
الموسيقي التصويرية لعبت دور مهم جداً فى الأحداث ونقدر نعتبرها البطل الثاني بعد الأبطال الممثلين، كمان الديكورات –على الرغم من قلتها- لكن نقلت لنا السياق الدرامي للأحداث بشكل متميز جداً ويستحق التحية والإعجاب.
لو عاوزين فيلم رعب مستوي على نار هادية ماتفوتوش Don’t Breathe لإن فيه كل مقومات فيلم الرعب المثالي الناجح.
