Don’t Hang Up: من حفر حفرة لأخيه!
الأمثلة القديمة بتقول: من حفر حفرة لأخيه وقع فيها. هوليود كمان بتأكد على المعني ده من خلال سلسلة من أفلام الرعب اللي شوفناها على مدار تاريخها، لناس بدأت تفصيله صغيرة في حياتهم بخدعه صغيرة في الأخرين، وانتهت بكارثة كبيرة تلحق بيهم هم شخصيا.
من أشهر وأحسن الأفلام اللي شوفناها في السياق ده كان فيلم Joy ride من انتاج سنة 2001 عن قصة شابين بيتسلوا بمعاكسة سائقي السيارات من خلال اللاسلكي الخاص بالسيارات، ثم بينقلب الامر ضدهم لما بيصبحوا فريسة لمطاردة سائق شاحنة مجنون!
لكن مع التطور التكنولوجي الكبير تحول أسلوب المعاكسة والهزار من استخدام اللاسلكي، الى استخدام الموبايل، ورفع المقاطع المضحكة على مواقع التواصل الاجتماعي زي يوتيوب وغيرها، وده اللي قام به ابطال الفيلم.
القصة.
الفيلم بيحكي عن قصة شابين بيعملوا خدع في الناس من خلال التليفون، ويصوروا المقاطع ويرفعوها على مواقع التواصل الاجتماعي علشان يجيبوا عدد أكبر من المشاهدين والمتابعين.
لكن الحيلة بتنقلب على أصحابها، لما بيقعوا ضحية لرجل مجنون بيكلمهم على التليفون، وبيلعب معاهم لعبة قاسية جدا، وأهم قاعدة في اللعبة: ما تقفلوش التليفون. ولو واحد فيهم فكر يغلق السكة. بتحصل مصيبة كبيرة تخليه يشيل من دماغه فكرة اغلاق الخط!
فريق العمل.
الفيلم من إخراج داميان ماسيه و ألكسيس واسبروت ومن تأليف جو جونسون ومن بطولة جريج سولكين و جاريت كلايتون و بيلا داين و سينا جيلوري
الموسيقي التصويرية والديكورات.
الموسيقي التصويرية لعبت دور مهم في أحداث الفيلم، وقدرت تدخلنا للمود العام للأحداث بشكل سريع ومباشر، وقدرت الموسيقي تكون خافتة في المشاهد المهمة، وتتسارع وتتعالى في بعض المواقف الثانية علشان نشعر معاها بالرعب والترقب.
الديكورات أيضا كان لها دور مهم ومميز، لكن الصراحة تركيزنا كمشاهدين مش بيكون له علاقة كبيرة بالديكورات، في فيلم كل لحظه فيه تقريبا بتحمل تهديد جديد أو بتنقل شعورنا بالإثارة والترقب لمستوى أعلى
وأخيراً.
فيلم Don’t Hang Up الإثبات العملي الحديث على أن التنمر والمقالب مش دايما بتكون نتيجتها كويسه، شوفوا بنفسكم الفيلم وشاركونا برأيكم.
علشان تبقى عارف: تقييم الفيلم على موقع IMDB 5.8 من 10 وشارك في التصويت حوالي 5000 مستخدم للموقع.
