Downrange : سكة السلامة!
تعمل ايه لما تكون مسئول عن فيلم محدود الميزانية وفي نفس الوقت عاوز تعمل فيلم قوي؟ تشتغل على الفكرة والتصوير وطريقة الإخراج. هو ده الحصل الوحيد اللي ممكن تقدم بيهم فيلم قوي مع إمكانيات محدودة.
فيلم Downrange بيحكي عن قناص محترف بيستهدف مجموعة من الشباب بتتعطل سيارتهم على أحد الطرق السريعة المهجورة بعد انفجار الإطار الخاص بيها.
المخرج ريهاي كيتامورا والمؤلف جوي أوبريان – واللي اشترك معاه ريهاي كيتامورا في التأليف- تضافروا علشان يقدموا لنا فيلم مرعب بشكل مختلف. يعني مش بنشوف أشباح وأرواح. لكن رعب قائم على فكرة أن اللي حصل لمجموعة الشباب ممكن يحصل لأي واحد من مشاهدي الفيلم.
ومن هنا بنشوف نجاح أبطال الفيلم رود هيرنانديز و كيلي كونيير و ألكسا ياميز وباقي أبطال الفيلم واللي قدروا يقدموا أداء تمثيلي صادق وحقيقي على الرغم من حداثة كتير منهم بعالم التمثيل.
وفي النوعية دي من الأفلام لازم يحصل تضافر بين مجهود الإخراج والتصوير مع التمثيل علشان الجميع يقدموا عمل فيه وحده وقوه. وهو ده اللي شوفناه في الفيلم على الرغم من انخفاض الميزانية اللي كان واضح في كافة تفاصيل الفيلم تقريبا لكن لم يؤثر على تجربتنا كمشاهدين.
Downrange فيلم اثارة ورعب وتشويق بشكل مختلف. مش هايعجب كل المشاهدين لكن محبي نوعية الأفلام اللي فيها عدد محدود من الممثلين مع قصة قوية وحبكة مختلفة هايعجبهم الفيلم.
